കൊല്‍ക്കത്ത: പശ്ചിമ ബംഗാള്‍ മുഖ്യമന്ത്രിയായി ബി.ജെ.പി നേതാവ് സുവേന്ദു അധികാരി സത്യപ്രതിജ്ഞ ചെയ്ത് അധികാരമേറ്റെടുത്തു. ഈശ്വരനാമത്തിലാണ് സത്യപ്രതിജ്ഞ ചെയ്തത്. ഗവര്‍ണര്‍ ആര്‍.എന്‍ രവി സത്യവാചകം ചൊല്ലിക്കൊടുത്തു. ഇന്ന് രാവിലെ 11.30ന് കൊല്‍ക്കത്ത ബ്രിഗേഡ് പരേഡ് ഗ്രൗണ്ടിലാണ് സത്യപ്രതിജ്ഞാ ചടങ്ങുകള്‍ നടന്നത്.  പ്രധാനമന്ത്രി നരേന്ദ്രമോദി  ഉള്‍പ്പെടെ എന്‍.ഡി.എ നേതാക്കള്‍ ചടങ്ങില്‍ പങ്കെടുത്തു. 

ഇന്നലെ കൊല്‍ക്കത്തയില്‍ നടന്ന ബി.ജെ.പി നിയമസഭാ പാര്‍ട്ടി യോഗത്തിലാണ് സുവേന്ദു അധികാരിയെ നിയമസഭാ കക്ഷി നേതാവായി തിരഞ്ഞെടുത്തത്. കേന്ദ്ര ആഭ്യന്തര മന്ത്രി അമിത് ഷാ, ഒഡിഷ മുഖ്യമന്ത്രി മോഹന്‍ ചരണ്‍ മാജി എന്നിവര്‍ നിരീക്ഷകരായി പങ്കെടുത്തു. മുതിര്‍ന്ന നേതാവും മുന്‍ സംസ്ഥാന പ്രസിഡന്റുമായ ദിലീപ് ഘോഷ് സുവേന്ദു അധികാരിയുടെ പേര് നിര്‍ദേശിച്ചു. പിന്നീട് സുവേന്ദു അധികാരിയുടെ പേര് മുഖ്യമന്ത്രി സ്ഥാനത്തേക്ക് ആഭ്യന്തരമന്ത്രി അമിത് ഷാ നിയമസഭാ കക്ഷി യോഗത്തില്‍ പ്രഖ്യാപിച്ചു.

15 വര്‍ഷത്തെ തൃണമൂല്‍ കോണ്‍ഗ്രസ് ഭരണം അവസാനിപ്പിച്ചാണ് ബി.ജെ.പി അധികാരത്തിലെത്തിയത്. കോണ്‍ഗ്രസിലും പിന്നീട് മമത ബാനര്‍ജിയുടെ വിശ്വസ്തനായി തൃണമൂല്‍ കോണ്‍ഗ്രസിലും പ്രവര്‍ത്തിച്ച സുവേന്ദു അധികാരി മമതയുമായി തെറ്റിപ്പിരിഞ്ഞ് 2020 ഡിസംബറിലാണ് ബി.ജെ.പിയില്‍ ചേര്‍ന്നത്. 2021 ല്‍ നന്ദിഗ്രാമില്‍ മമതയെ പരാജയപ്പെടുത്തിയ സുവേന്ദു കഴിഞ്ഞ നിയമസഭയില്‍ പ്രതിപക്ഷ നേതാവായിരുന്നു. ഇക്കഴിഞ്ഞ നിയമസഭാ തെരഞ്ഞെടുപ്പില്‍ തൃണമൂല്‍ കോണ്‍ഗ്രസിന്റെ ശക്തികേന്ദ്രമായ ഭബാനിപൂരില്‍ മുഖ്യമന്ത്രി മമത ബാനര്‍ജിയെ പരാജയപ്പെടുത്തി.

In a historic political shift, Suvendu Adhikari has been sworn in as the first-ever BJP Chief Minister of West Bengal. The swearing-in ceremony marks the end of an intense political battle and signals a new era for the state