ദുബൈ: ദുബൈയിലെ അൽ ഖബൈസിയിൽ ഗോഡൗണിനുണ്ടായ തീപിടിത്തവുമായി ബന്ധപ്പെട്ട് സമൂഹമാധ്യമങ്ങളിൽ വ്യാജ വീഡിയോകൾ പ്രചരിക്കുന്നതായി റിപ്പോർട്ട്. നിലവിലെ സാഹചര്യവുമായി യാതൊരു ബന്ധവുമില്ലാത്ത ദൃശ്യങ്ങളാണ് ചിലർ പ്രചരിപ്പിക്കുന്നത്. ഔദ്യോഗിക ചാനലുകൾ വഴി ലഭിക്കുന്ന വിവരങ്ങൾ മാത്രം വിശ്വസിക്കണമെന്നും തെറ്റായ വാർത്തകൾ പങ്കുവെക്കരുതെന്നും അധികൃതർ താമസക്കാർക്ക് കർശന നിർദ്ദേശം നൽകി.

വെള്ളിയാഴ്ച രാവിലെയാണ് അൽ ഖബൈസി പ്രദേശത്തെ ഒരു വെയർഹൗസിൽ തീപിടുത്തമുണ്ടായതായി ദുബൈ സിവിൽ ഡിഫൻസ് ഓപ്പറേഷൻസ് റൂമിൽ വിവരം ലഭിക്കുന്നത്. ഉടൻ തന്നെ പോർട്ട് സയീദ് ഫയർ സ്റ്റേഷനിൽ നിന്നുള്ള ആദ്യസംഘം സ്ഥലത്തെത്തി. പിന്നീട് സഹായത്തിനായി അൽ ഹംരിയ സ്റ്റേഷനിൽ നിന്നുള്ള അഗ്നിശമന സേനാംഗങ്ങളും സ്ഥലത്തെത്തി. കേവലം ഏഴ് മിനിറ്റിനുള്ളിൽ തന്നെ അഗ്നിശമന സേനയ്ക്ക് സംഭവസ്ഥലത്ത് എത്തിച്ചേരാൻ സാധിച്ചു.

തീപിടുത്തം പെട്ടെന്നു തന്നെ നിയന്ത്രണവിധേയമാക്കിയെന്നും സംഭവത്തിൽ ആർക്കും പരുക്കേറ്റിട്ടില്ലെന്നും അധികൃതർ വ്യക്തമാക്കി. രാവിലെ 8:13 ഓടെ തീ പൂർണ്ണമായും നിയന്ത്രണവിധേയമാക്കുകയും കൂളിം​ഗ് നടപടികൾ ആരംഭിക്കുകയും ചെയ്തു. കൃത്യസമയത്ത് ഇടപെടാൻ സാധിച്ചതിനാൽ വൻ ദുരന്തം ഒഴിവാക്കാനായി. ഇമാറാത്തിലെ സുരക്ഷാ മുൻകരുതലുകൾ കർശനമായി പാലിക്കണമെന്നും അടിയന്തര സാഹചര്യങ്ങളിൽ ഔദ്യോഗിക അറിയിപ്പുകൾക്കായി കാത്തിരിക്കണമെന്നും ദുബൈ സിവിൽ ഡിഫൻസ് അറിയിച്ചു.

ALSO READ: ഇൻസ്റ്റഗ്രാമിൽ പങ്കുവെച്ച ആഡംബര ബാഗിന്റെ ചിത്രത്തിന് താഴെ ഒറിജിനൽ അല്ലെന്നു കമന്റിട്ടു; അജ്മാനിൽ പ്രവാസി യുവതി അറസ്റ്റിൽ

authorities in dubai warned residents against spreading fake videos after a warehouse fire in al khabaisi. officials confirmed the blaze is under control and urged the public to rely only on verified updates.