ദുബൈ: യുഎഇയിലെ പ്രിയപ്പെട്ട വിനോദസഞ്ചാര കേന്ദ്രമായ ദുബൈ ഗ്ലോബൽ വില്ലേജിന്റെ ഈ സീസണിലെ സമാപന തീയതി നീട്ടി. സന്ദർശകരുടെ വൻ തിരക്കും വലിയ പെരുന്നാൾ അവധിക്കാലവും കണക്കിലെടുത്ത് മെയ് 31 വരെ പാർക്ക് തുറന്നുപ്രവർത്തിക്കുമെന്ന് അധികൃതർ അറിയിച്ചു. കുടുംബങ്ങൾക്കും വിനോദസഞ്ചാരികൾക്കും കൂടുതൽ സമയം ആസ്വദിക്കാനുള്ള അവസരമാണ് ഇതിലൂടെ ഒരുങ്ങുന്നത്.

ഗ്ലോബൽ വില്ലേജിന്റെ 30-ാം സീസൺ ഒരു സുപ്രധാന നാഴികക്കല്ലാണെന്നും മൂന്ന് പതിറ്റാണ്ടിലെ വിജയകരമായ യാത്രയാണ് ഇത് പ്രതിഫലിപ്പിക്കുന്നതെന്നും ദുബൈ ഹോൾഡിംഗ് എന്റർടൈൻമെന്റ് സിഇഒ ഫെർണാണ്ടോ ഐറോവ പറഞ്ഞു. ഏപ്രിൽ 20-ന് പുനരാരംഭിച്ചത് മുതൽ സന്ദർശകരുടെ അഭൂതപൂർവമായ തിരക്കാണ് അനുഭവപ്പെടുന്നത്. ഈ സാഹചര്യത്തിലാണ് ഇന്ന് സമാപിക്കേണ്ടിയിരുന്ന സീസൺ നീട്ടാൻ തീരുമാനിച്ചത്.

ALSO READ: കരുത്തുകാട്ടി യുഎഇ സായുധസേന; ഇറാന്റെ ഡ്രോൺ ആക്രമണശ്രമം തകർത്തു

സന്ദർശകർക്കായി ആകർഷകമായ ഓഫറുകൾ

സീസൺ നീട്ടിയതിനോടൊപ്പം സന്ദർശകർക്കായി പ്രത്യേക 'വണ്ടർ പാസ്' ഓഫറും അവതരിപ്പിച്ചിട്ടുണ്ട്. 99 ദിർഹത്തിന് ലഭിക്കുന്ന ഈ പാസ് ഉപയോഗിച്ച് കാർണിവൽ സോണിലെ 195-ലധികം റൈഡുകളിലും ഗെയിമുകളിലും ഒരു ദിവസം മുഴുവൻ പരിധിയില്ലാത്ത പ്രവേശനം ലഭിക്കും. ഓൺലൈനായും നേരിട്ടും ഈ പാസുകൾ സ്വന്തമാക്കാവുന്നതാണ്.

അഡ്രിനാലിൻ പ്രേമികൾക്കായി ടൊറന്റോ ടൊർണാഡോ, കേപ് ഗ്ലൈഡേഴ്‌സ്, റിയോ റോക്കറ്റ് തുടങ്ങിയ അഞ്ച് പുതിയ റൈഡുകൾ ഈ സീസണിലെ പ്രത്യേകതയാണ്. കുട്ടികൾക്കായി പുതുതായി ഒരുക്കിയ 'ലിറ്റിൽ വണ്ടറേഴ്‌സ്' ഇൻഡോർ പ്ലേ ഏരിയയും സന്ദർശകരെ ആകർഷിക്കുന്നുണ്ട്.

സന്ദർശകരുടെ സൗകര്യാർത്ഥം പ്രവർത്തന സമയത്തിലും മാറ്റം വരുത്തിയിട്ടുണ്ട്. പ്രവൃത്തിദിവസങ്ങളിൽ അർദ്ധരാത്രി വരെയും വെള്ളി, ശനി ദിവസങ്ങളിൽ വൈകുന്നേരം 5 മണി മുതൽ പുലർച്ചെ 1 മണി വരെയുമാണ് പാർക്ക് പ്രവർത്തിക്കുക. മെയ് 31 വരെ ലഭിക്കുന്ന ഈ അധിക സമയം ദുബൈയിലെ താമസക്കാർക്കും വിനോദസഞ്ചാരികൾക്കും ആഘോഷങ്ങൾക്കും ഷോപ്പിംഗിനും വലിയ അവസരമാണ് നൽകുന്നത്.

Dubai’ s Global Village season has been extended until May 31, giving residents and tourists more time to enjoy attractions during Eid celebrations.