റിയാദ്: സഊദി അറേബ്യയില്‍ തൊഴില്‍ നിയമങ്ങള്‍ ലംഘിച്ച സ്ഥാപനങ്ങള്‍ക്കെതിരെ മന്ത്രാലയം നടപടി കടുപ്പിച്ചു. രാജ്യവ്യാപകമായി നടത്തിയ പരിശോധനകളില്‍ നിയമലംഘനം കണ്ടെത്തിയതിനെ തുടര്‍ന്ന് 7,200 വര്‍ക്ക് വിസകള്‍ റദ്ദാക്കി. മാനവശേഷി, സാമൂഹിക വികസന മന്ത്രാലയമാണ് ഇക്കാര്യം അറിയിച്ചത്. വിസകള്‍ റദ്ദാക്കിയതിന് പുറമെ, നിയമലംഘനം നടത്തിയ സ്ഥാപനങ്ങള്‍ക്ക് നല്‍കി വന്നിരുന്ന പ്രധാന സര്‍ക്കാര്‍ സേവനങ്ങളും മന്ത്രാലയം നിര്‍ത്തിവെച്ചിട്ടുണ്ട്.
മന്ത്രാലയത്തിന്റെ നിരീക്ഷണ വിഭാഗവും സ്മാര്‍ട്ട് സര്‍വൈലന്‍സ് സംവിധാനങ്ങളും സംയുക്തമായി നടത്തിയ പരിശോധനയിലാണ് നടപടി. സംശയാസ്പദമായ 91,000 കേസുകള്‍ പരിശോധിച്ചതില്‍ 13,509 കേസുകളില്‍ തൊഴില്‍ ബന്ധങ്ങളില്‍ അപാകതകള്‍ കണ്ടെത്തി. ഇത്തരം സ്ഥാപനങ്ങളെ 'നിതാഖാത്' സ്വദേശിവല്‍ക്കരണ പദ്ധതിയുടെ ആനുകൂല്യങ്ങളില്‍ നിന്ന് ഒഴിവാക്കി.

ബാധിക്കപ്പെട്ട തൊഴിലാളികള്‍ക്ക് നിയമപരമായ രീതിയില്‍ പുതിയ തൊഴില്‍ കണ്ടെത്തുന്നതിനായി അവരെ ഹ്യൂമന്‍ റിസോഴ്‌സ് ഡെവലപ്‌മെന്റ് ഫണ്ടിലേക്ക് (ഹദഫ്) റഫര്‍ ചെയ്തിട്ടുണ്ട്. 2026ന്റെ ആദ്യ പാദത്തില്‍ സ്വകാര്യ മേഖലയിലെ സ്ഥാപനങ്ങളില്‍ മന്ത്രാലയം ഏകദേശം 2,50,000 ഫീല്‍ഡ് പരിശോധനകളാണ് നടത്തിയത്. ഇതില്‍ 1,68,000 നിയമലംഘനങ്ങള്‍ കണ്ടെത്തുകയും 2,30,000 സ്ഥാപനങ്ങള്‍ക്ക് പിഴവുകള്‍ തിരുത്താന്‍ മുന്നറിയിപ്പ് നല്‍കുകയും ചെയ്തു.
റിക്രൂട്ട്‌മെന്റ് ഓഫീസുകളില്‍ മാത്രം 3,522 നിയമലംഘനങ്ങള്‍ കണ്ടെത്തി. സോഷ്യല്‍ മീഡിയ വഴി നിയമവിരുദ്ധമായി ഗാര്‍ഹിക തൊഴിലാളി സേവനങ്ങള്‍ വാഗ്ദാനം ചെയ്ത 238 അക്കൗണ്ടുകള്‍ക്കെതിരെയും അധികൃതര്‍ നടപടി സ്വീകരിച്ചു. മനുഷ്യക്കടത്ത് തടയുന്നതിന്റെ ഭാഗമായി 54,000 മുന്‍കരുതല്‍ പരിശോധനകളും മന്ത്രാലയം പൂര്‍ത്തിയാക്കി. പൊതുജനങ്ങളില്‍ നിന്നുള്ള 15,563 റിപ്പോര്‍ട്ടുകളില്‍ 96.96 ശതമാനത്തിലും കൃത്യസമയത്ത് നടപടി സ്വീകരിച്ചതായും മന്ത്രാലയം വ്യക്തമാക്കി.

Summary: Saudi Arabia’s Ministry of Human Resources and Social Development (MHRSD) has intensified its enforcement of labor regulations, resulting in the cancellation of over 7,200 work visas issued to non-compliant firms.