ഇടുക്കി: ചിന്നക്കനാലിന് സമീപം പെരിയകനാൽ വളവിൽ വിനോദസഞ്ചാര സംഘം സഞ്ചരിച്ച മിനി ബസ് നിയന്ത്രണം വിട്ട് മറിഞ്ഞ് യുവതി മരിച്ചു. തമിഴ്‌നാട് വിരുദനഗർ സ്വദേശിനി സ്റ്റെല്ല മേരി (27) ആണ് മരിച്ചത്. അപകടത്തിൽ പരിക്കേറ്റ ആറ് പേരെ തേനി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇതിൽ രണ്ടുപേരുടെ നില അതീവ ഗുരുതരമായി തുടരുകയാണ്.

അപകടം മടക്കയാത്രയ്ക്കിടെ

തമിഴ്‌നാട്ടിൽ നിന്നുള്ള 27 അംഗ സംഘമാണ് ബസ്സിലുണ്ടായിരുന്നത്. ഇന്നലെ മൂന്നാറിലെത്തിയ സംഘം സന്ദർശനം കഴിഞ്ഞ് മടങ്ങുന്നതിനിടെയാണ് ഇന്ന് അപകടത്തിൽപ്പെട്ടത്. പെരിയകനാൽ ഭാഗത്തെ കുത്തനെയുള്ള വളവ് ഇറങ്ങുന്നതിനിടെ ബസ് നിയന്ത്രണം വിട്ട് റോഡരികിലെ താഴ്ചയിലേക്ക് മറിയുകയായിരുന്നു.

രക്ഷാപ്രവർത്തനം നടത്തിയത് നാട്ടുകാരും ഡ്രൈവർമാരും

അപകടമുണ്ടായ ഉടൻ തന്നെ പരിസരത്തുണ്ടായിരുന്ന ജീപ്പ് ഡ്രൈവർമാരും നാട്ടുകാരും ചേർന്നാണ് രക്ഷാപ്രവർത്തനം നടത്തിയത്. ബസ്സിനുള്ളിൽ കുടുങ്ങിക്കിടന്നവരെ പുറത്തെടുത്ത് ഉടൻ തന്നെ ടാറ്റ ഹൈറേഞ്ച് ആശുപത്രിയിൽ എത്തിച്ചു. പ്രാഥമിക ചികിത്സയ്ക്ക് ശേഷമാണ് ഗുരുതരമായി പരിക്കേറ്റവരെ തേനി മെഡിക്കൽ കോളേജിലേക്ക് മാറ്റിയത്.

നിലവിൽ ടാറ്റ ഹൈറേഞ്ച് ആശുപത്രിയിൽ കഴിയുന്ന മറ്റ് സഞ്ചാരികളുടെ പരിക്ക് സാരമുള്ളതല്ലെന്നും ഇവരുടെ ആരോഗ്യനില തൃപ്തികരമാണെന്നും ആശുപത്രി അധികൃതർ അറിയിച്ചു. മൂന്നാർ പൊലിസും സ്ഥലത്തെത്തി തുടർ നടപടികൾ സ്വീകരിച്ചു.