കാണ്ട്ല (ഗുജറാത്ത്): ദീന്‍ദയാല്‍ തുറമുഖത്ത് ഖത്തറില്‍ നിന്ന് 20,000 മെട്രിക് ടണ്‍ ദ്രവീകൃത പെട്രോളിയം വാതകം (എല്‍പിജി) വഹിച്ചെത്തിയ കപ്പല്‍ നങ്കൂരമിട്ടതായി അധികൃതര്‍ അറിയിച്ചു. പശ്ചിമേഷ്യന്‍ സംഘര്‍ഷാവസ്ഥ തുടരുന്നതിനിടെയാണ് കപ്പല്‍ സുരക്ഷിതമായി ഗുജറാത്തിലെ കാണ്ട്‌ലയില്‍ എത്തിയത്.

മാര്‍ഷല്‍ ദ്വീപുകളുടെ പതാക വഹിക്കുന്ന എംവി സിഎംഐ എന്ന കപ്പല്‍ മെയ് 13-ന് ഹോര്‍മുസ് കടലിടുക്ക് കടന്നതിനു ശേഷം ശനിയാഴ്ച രാത്രി 11.30 ഓടെയാണ് തുറമുഖത്ത് എത്തിയത്. ലോകത്തിലെ പ്രധാന ഊര്‍ജ്ജ ഗതാഗത പാതകളിലൊന്നായ ഹോര്‍മുസ് കടലിടുക്കിലൂടെ ആഗോള എണ്ണ-വാതക വിതരണത്തിന്റെ വലിയൊരു പങ്കാണ് കടന്നുപോകുന്നത്.

ഫെബ്രുവരി അവസാനം മുതല്‍ പശ്ചിമേഷ്യയില്‍ രൂക്ഷമായ സംഘര്‍ഷാവസ്ഥ തുടരുകയാണ്. അമേരിക്കയും ഇസ്രാഈലും ഇറാനെതിരെ സംയുക്ത ആക്രമണം നടത്തിയതും തുടര്‍ന്ന് ഇറാന്റെ പ്രതികാര നടപടികളും മേഖലയിലെ അനിശ്ചിതത്വം വര്‍ധിപ്പിച്ചു. ഇതോടെ ആഗോള ഊര്‍ജ്ജ വിതരണത്തെയും കടല്‍ഗതാഗതത്തെയും കുറിച്ചുള്ള ആശങ്കകളും ശക്തമായി.

മാര്‍ച്ച് ആദ്യം മുതല്‍ 12 എല്‍പിജി ടാങ്കറുകളും ഒരു ക്രൂഡ് ഓയില്‍ ടാങ്കറും ഉള്‍പ്പെടെ 13 ഇന്ത്യന്‍ പതാകയുള്ള കപ്പലുകള്‍ ഹോര്‍മുസ് കടലിടുക്ക് കടന്നതായി റിപ്പോര്‍ട്ടുണ്ട്.

ഐക്യരാഷ്ട്രസഭയുടെ പ്രത്യേക യോഗത്തില്‍ യുഎന്നിലെ ഇന്ത്യയുടെ സ്ഥിരം പ്രതിനിധി പര്‍വതനേനി ഹരീഷ് വാണിജ്യ കപ്പലുകളെ ലക്ഷ്യമിട്ടുള്ള ആക്രമണങ്ങള്‍ അംഗീകരിക്കാനാവില്ലെന്ന് വ്യക്തമാക്കി. നാവിഗേഷന്‍ സ്വാതന്ത്ര്യത്തെ തടസ്സപ്പെടുത്തുന്നതും സിവിലിയന്‍ ജീവനക്കാരെ അപകടത്തിലാക്കുന്നതും അസ്വീകാര്യമാണെന്ന് അദ്ദേഹം പറഞ്ഞു.

മെയ് 13-ന് ഒമാന്‍ തീരത്തിന് സമീപം ഇന്ത്യന്‍ പതാകയുള്ള ഒരു വാണിജ്യ കപ്പല്‍ ആക്രമിക്കപ്പെട്ടിരുന്നു. സൊമാലിയയില്‍ നിന്ന് യാത്ര തിരിച്ച കപ്പലിലെ 14 ജീവനക്കാരെയും ഒമാനി അധികൃതര്‍ രക്ഷപ്പെടുത്തിയെങ്കിലും ആക്രമണത്തിന് പിന്നില്‍ ആരാണെന്നത് വ്യക്തമല്ല.