ഷാർജ: ഇമാറാത്തിലുടനീളം എല്ലാത്തരം ഡ്രോണുകളുടെയും ഉപയോഗവും പ്രവർത്തനങ്ങളും നിയന്ത്രിക്കുന്നതിനുള്ള പുതിയ കരട് നിയമത്തിന് അം​ഗീകാരം നൽകി ഷാർജ കൺസൾട്ടേറ്റീവ് കൗൺസിൽ. ഡ്രോണുകളുടെ വർദ്ധിച്ചുവരുന്ന ഉപയോഗം കണക്കിലെടുത്ത് വ്യോമ സുരക്ഷ വർദ്ധിപ്പിക്കുന്നതിനും, കർശനമായ മേൽനോട്ടം ഉറപ്പാക്കുന്നതിനുമായാണ് പുതിയ നിയമനിർമ്മാണം. കൗൺസിൽ ചെയർപേഴ്‌സൺ ഹലീമ ഹമീദ് അൽ ഒവൈസിന്റെ അധ്യക്ഷതയിൽ നടന്ന പതിനാറാം സെഷനിലാണ് നിരവധി ഭേദഗതികളോടെ നിയമം പാസാക്കിയത്.

ഇമാറാത്തിലെ വികസന പദ്ധതികൾക്കും സാങ്കേതിക പുരോഗതികൾക്കും അനുസൃതമായ ഒരു ആധുനിക ചട്ടക്കൂടാണ് ഇതിലൂടെ ലക്ഷ്യമിടുന്നതെന്ന് ഷാർജ സിവിൽ ഏവിയേഷൻ ഡിപ്പാർട്ട്‌മെന്റ് ചെയർമാൻ ശൈഖ് ഖാലിദ് ബിൻ എസ്സാം ബിൻ സഖർ അൽ ഖാസിമി വ്യക്തമാക്കി. ഡ്രോണുകളുടെ കൃത്യമായ രജിസ്ട്രേഷൻ നടപടിക്രമങ്ങൾ, അവയുടെ ഉപയോഗം അടിസ്ഥാനമാക്കിയുള്ള തരംതിരിക്കൽ, പ്രവർത്തനങ്ങൾ നിയന്ത്രിക്കാനുള്ള സംവിധാനങ്ങൾ എന്നിവയെല്ലാം പുതിയ നിയമത്തിൽ ഉൾപ്പെടും.

ഹെലികോപ്റ്റർ ലാൻഡിംഗ് പാഡുകളുടെ ഉപയോഗം, ഡ്രോണുകൾക്കായി പ്രത്യേകം നിശ്ചയിച്ചിട്ടുള്ള പറക്കൽ മേഖലകൾ (Flight Zones), ഉയര പരിധികൾ, വ്യോമാതിർത്തി നിയന്ത്രണങ്ങൾ (Airspace Limits), സുരക്ഷാ നിർദ്ദേശങ്ങൾ എന്നിവയെല്ലാം നിയമത്തിൽ കൃത്യമായി വിശദീകരിക്കുന്നുണ്ട്. ഡ്രോൺ സാങ്കേതികവിദ്യയുടെ നേട്ടങ്ങളെ ഉയർന്ന സുരക്ഷാ മാനദണ്ഡങ്ങളുമായി സന്തുലിതമാക്കേണ്ടതിന്റെ പ്രാധാന്യം കൗൺസിൽ യോഗത്തിൽ അംഗങ്ങൾ ചൂണ്ടിക്കാട്ടി. അന്താരാഷ്ട്ര മാനദണ്ഡങ്ങൾ പാലിച്ചുകൊണ്ട് തന്നെയായിരിക്കും നിയന്ത്രണങ്ങൾ നടപ്പിലാക്കുക.

പുതിയ നിയമം ഫലപ്രദമായി നടപ്പിലാക്കുന്നതിനായി എമിറേറ്റിലെ വിവിധ വകുപ്പുകൾ ഏകോപിച്ച് പ്രവർത്തിക്കും. ഇതിൽ ഡ്രോൺ പ്രവർത്തനങ്ങളുടെ സാങ്കേതിക വശങ്ങൾക്കും മേൽനോട്ടത്തിനും ഷാർജ സിവിൽ ഏവിയേഷൻ വകുപ്പ് നേതൃത്വം നൽകുമ്പോൾ, നിയമലംഘനങ്ങളും കുറ്റകൃത്യങ്ങളും തടയുന്നതിനുള്ള പൂർണ്ണ ചുമതല ഷാർജ പൊലിസിന്റെ ജനറൽ കമാൻഡിനായിരിക്കും. വിശദമായ പഠനങ്ങൾക്കും ചർച്ചകൾക്കും ശേഷമാണ് കൗൺസിൽ സുപ്രധാന നിയമനിർമ്മാണത്തിന് പച്ചക്കൊടി കാട്ടിയിരിക്കുന്നത്.

ALSO READ: ആളറിഞ്ഞു ട്രോളുക, യു.എ.ഇയിൽ ചൊറിയൻ കമന്റുകൾക്ക് വലിയ വില നൽകേണ്ടിവരും; ഒരു കോടി രൂപ വരെ പിഴ കിട്ടും | UAE Social Media Law

sharjah has approved a new draft law aimed at regulating drone operations across the emirate. the move seeks to strengthen public safety, airspace management, and legal compliance for recreational and commercial drone users.