കൊല്‍ക്കത്ത: പശ്ചിമ ബംഗാളില്‍ ഒബിസി സംവരണം നിര്‍ത്തലാക്കി ബിജെപി. തൃണമൂല്‍ സര്‍ക്കാരിന്റെ കാലത്ത് നടപ്പിലാക്കിയ മതാധിഷ്ഠിത ധനസഹായ പദ്ധതികളെല്ലാം നിര്‍ത്തലാക്കാനും സുവേന്ദു അധികാരി ഉത്തരവിട്ടു. സംവരണ യോഗ്യത പുനര്‍നിര്‍ണയിക്കാന്‍ പുതിയ പാനല്‍ രൂപീകരിക്കാനും തിങ്കളാഴ്ച്ച ചേര്‍ന്ന മന്ത്രിസഭാ യോഗം തീരുമാനിച്ചു. 

സംസ്ഥാനത്ത് മതത്തിന്റെ അടിസ്ഥാനത്തില്‍ നല്‍കി വന്നിരുന്ന എല്ലാ സര്‍ക്കാര്‍ ആനുകൂല്യങ്ങളും പദ്ധതികളും ജൂണ്‍ മാസം മുതല്‍ നിര്‍ത്തലാക്കാനാണ് നീക്കം. ഇന്‍ഫര്‍മേഷന്‍ ആന്‍ഡ് കള്‍ച്ചറല്‍ അഫയേഴ്‌സ്, ന്യൂനപക്ഷ കാര്യ-മദ്രസ വിദ്യാഭ്യാസ വകുപ്പുകള്‍ മുഖേന നടപ്പിലാക്കിയിരുന്ന ഇത്തരം പദ്ധതികള്‍ അവസാനിപ്പിച്ചു. 

77 സമുദായങ്ങളുടെ ഒബിസി പദവി റദ്ദാക്കിയ കല്‍ക്കട്ട ഹൈക്കോടതി ഉത്തരവിനെതിരെ 2024ല്‍ മമത സര്‍ക്കാര്‍ സുപ്രീം കോടതിയില്‍ നല്‍കിയിരുന്ന ഹരജി ബിജെപി സര്‍ക്കാര്‍ പിന്‍വലിച്ചിരുന്നു. ഇതിന് പിന്നാലെയാണ് നിലവിലെ ഒബിസി പട്ടികയും റദ്ദാക്കിയത്. 

ALSO READ: ജൂണ്‍ 15 മുതല്‍ കെ.എസ്.ആര്‍.ടി.സിയില്‍ സ്ത്രീകള്‍ക്ക് സൗജന്യയാത്ര, ആശമാരുടെ വേതനം കൂട്ടി, വയോജന വകുപ്പ് രൂപീകരിക്കും; ആദ്യമന്ത്രിസഭാ യോഗത്തില്‍ സുപ്രധാന തീരുമാനങ്ങള്‍

2011ല്‍ തൃണമൂല്‍ കോണ്‍ഗ്രസ് അധികാരത്തില്‍ വന്നതുമുതല്‍ വിതരണം ചെയ്ത 1.69 കോടിയോളം വരുന്ന എസ്.സി, എസ്.ടി, ഒബിസി സര്‍ട്ടിഫിക്കറ്റുകള്‍ വീണ്ടും പരിശോധിക്കാന്‍ പുതിയ സര്‍ക്കാര്‍ ഉത്തരവിട്ടിട്ടുണ്ട്. വ്യാജ ജാതി സര്‍ട്ടിഫിക്കറ്റുകള്‍ വ്യാപകമായി വിതരണം ചെയ്യപ്പെട്ടെന്നാണ് ബിജെപി ആരോപിക്കുന്നത്. മുന്‍ സര്‍ക്കാരിന്റെ കാലത്ത് 'ദുആരെ സര്‍ക്കാര്‍' പദ്ധതിയിലൂടെ നല്‍കിയ സര്‍ട്ടിഫിക്കറ്റുകളും പരിശോധിക്കും. അനധികൃതമായി ആനുകൂല്യം കൈപ്പറ്റിയെന്ന് കണ്ടെത്തിയാല്‍ കര്‍ശന നടപടിയെടുക്കുമെന്നും സര്‍ക്കാര്‍ അറിയിച്ചു.