മനാമ: ആഫ്രിക്കൻ രാജ്യങ്ങളിൽ എബോള വൈറസ് ബാധ അതിവേഗം പടരുന്ന പശ്ചാത്തലത്തിൽ മുൻകരുതൽ നടപടികളുമായി ബഹ്‌റൈൻ. ഡെമോക്രാറ്റിക് റിപ്പബ്ലിക് ഓഫ് കോംഗോ (DRC), ഉഗാണ്ട, ദക്ഷിണ സുഡാൻ എന്നീ മൂന്ന് രാജ്യങ്ങളിൽ നിന്നുള്ള വിദേശ സഞ്ചാരികൾക്ക് ബഹ്‌റൈൻ താൽക്കാലിക യാത്രാവിലക്ക് ഏർപ്പെടുത്തി. ഇന്ന് മുതൽ അടുത്ത 30 ദിവസത്തേക്കാണ് വിലക്ക്. ബഹ്‌റൈൻ ഇതര പൗരന്മാർക്കാണ് ഈ നിയന്ത്രണം ബാധകമാവുകയെന്ന് രാജ്യത്തെ ഔദ്യോഗിക വാർത്താ ഏജൻസി വ്യക്തമാക്കി.

പൊതുജനാരോഗ്യം സംരക്ഷിക്കുന്നതിനും രാജ്യത്തേക്ക് വൈറസ് പടരുന്നത് തടയുന്നതിനുമാണ് ബഹ്‌റൈൻ സിവിൽ ഏവിയേഷൻ ഈ അടിയന്തര നടപടി സ്വീകരിച്ചത്. എബോള വ്യാപനത്തെ തുടർന്ന് ജിസിസി (GCC) മേഖലയിൽ യാത്രാ നിയന്ത്രണം ഏർപ്പെടുത്തുന്ന ആദ്യ രാജ്യമാണ് ബഹ്‌റൈൻ.

ഡെമോക്രാറ്റിക് റിപ്പബ്ലിക് ഓഫ് കോംഗോയിലെ അതിർത്തി നഗരമായ ഗോമയിൽ 'ബുണ്ടിബുഗ്യോ' (Bundibugyo strain) എന്ന അപൂർവ ഇനം എബോള വൈറസ് പൊട്ടിപ്പുറപ്പെട്ടതായി ഇന്നലെ സ്ഥിരീകരിച്ചിരുന്നു. രോഗബാധിതരുടെ എണ്ണത്തിൽ വലിയ വർദ്ധനവാണ് കഴിഞ്ഞ ദിവസങ്ങളിൽ രേഖപ്പെടുത്തിയത്. നിലവിലെ എബോള വ്യാപനത്തിന്റെ വേഗതയിലും വ്യാപ്തിയിലും ലോകാരോഗ്യ സംഘടന (WHO) കടുത്ത ആശങ്ക രേഖപ്പെടുത്തുകയും പൊതുജനാരോഗ്യ അടിയന്തരാവസ്ഥ പ്രഖ്യാപിക്കുകയും ചെയ്തിട്ടുണ്ട്.

കിഴക്കൻ കോംഗോയിൽ മാത്രം കഴിഞ്ഞ 24 മണിക്കൂറിനുള്ളിൽ 26 മരണങ്ങൾ കൂടി റിപ്പോർട്ട് ചെയ്തതോടെ ആകെ മരണസംഖ്യ 131 ആയി ഉയർന്നു. കോംഗോയിൽ 516 സംശയാസ്പദമായ കേസുകളും 33 സ്ഥിരീകരിച്ച കേസുകളും റിപ്പോർട്ട് ചെയ്തിട്ടുണ്ട്. അയൽരാജ്യമായ ഉഗാണ്ടയിൽ രണ്ടും, ദക്ഷിണ സുഡാനിലും കേസുകൾ റിപ്പോർട്ട് ചെയ്ത പശ്ചാത്തലത്തിലാണ് ബഹ്‌റൈൻ ശക്തമായ പ്രതിരോധ നടപടികളിലേക്ക് കടന്നത്.

എന്താണ് എബോള വൈറസ്?

ആഫ്രിക്ക സെന്റേഴ്‌സ് ഫോർ ഡിസീസ് കൺട്രോൾ ആൻഡ് പ്രിവൻഷന്റെ (Africa CDC) വിവരങ്ങൾ പ്രകാരം പനി, കടുത്ത ശരീരവേദന, ഛർദ്ദി, വയറിളക്കം എന്നിവയ്ക്ക് കാരണമാകുന്ന മാരകമായ രോഗമാണിത്. രോഗബാധിതരായ മനുഷ്യരുടെയോ മൃഗങ്ങളുടെയോ ശരീരസ്രവങ്ങൾ (രക്തം, ഉമിനീര് മുതലായവ), മലിനമായ വസ്തുക്കൾ എന്നിവയുമായി നേരിട്ട് സമ്പർക്കം പുലർത്തുന്നതിലൂടെയാണ് ഈ വൈറസ് പ്രധാനമായും പടരുന്നത്. 1976-ൽ ആദ്യമായി കണ്ടെത്തിയതിന് ശേഷം കോംഗോയിൽ ഉണ്ടാകുന്ന 17-ാമത്തെ എബോള പൊട്ടിപ്പുറപ്പെടലാണിത്.

Bahrain has imposed a temporary travel ban on visitors from Congo, Uganda, and South Sudan following rising Ebola cases in Africa. The move aims to protect public health and prevent the virus from entering the Gulf nation.