ബംഗളൂരു: ബംഗളൂരുവില്‍ ഇരുപതുകാരിയായ മലയാളി യുവതി സുഹൃത്തിന്റെ താമസസ്ഥലത്ത് വച്ച് ബലാത്സംഗത്തിനിരയായതായി പരാതി. കഫേയില്‍ പാര്‍ട്ട് ടൈം ജോലി ചെയ്യുന്ന കോട്ടയം സ്വദേശിനിയായ യുവതിയാണ് അതിക്രമത്തിന് ഇരയായത്. സംഭവത്തില്‍ മഡിവാളയില്‍ താമസിക്കുന്ന സുല്‍ത്താന്‍ ബത്തേരി സ്വദേശി ഹൈനസിനെതിരെ പൊലിസ് കേസെടുത്തു. എന്നാല്‍ കേസ് ഒതുക്കിത്തീര്‍ക്കാനും പരാതിയില്‍ നിന്ന് പിന്തിരിപ്പിക്കാനും പൊലിസിന്റെ ഭാഗത്തുനിന്ന് വലിയ സമ്മര്‍ദ്ദമുണ്ടായതായി യുവതി ആരോപിക്കുന്നു.

ഈ മാസം 12നാണ് അതിക്രമം നടന്നത്. തൊട്ടടുത്ത ദിവസം തന്നെ യുവതി പരാതിയുമായി പൊലിസ് സ്റ്റേഷനിലെത്തിയെങ്കിലും മഡിവാള പൊലിസ് കേസ് രജിസ്റ്റര്‍ ചെയ്യാന്‍ തയ്യാറായില്ല. തുടര്‍ന്ന് ഡിസിപിക്ക നേരിട്ട് പരാതി നല്‍കിയ ശേഷമാണ് പൊലിസ് എഫ്.ഐ.ആര്‍ ഇടാന്‍ പോലും തയ്യാറായതെന്ന് യുവതി പറയുന്നു. പൊലിസ് സ്റ്റേഷനില്‍ വച്ചുപോലും പ്രതി തനിക്കെതിരെ വധഭീഷണി മുഴക്കിയതായും, പരാതി പിന്‍വലിച്ചില്ലെങ്കില്‍ വധിക്കുമെന്ന് ഭീഷണിപ്പെടുത്തിയതായും യുവതി വെളിപ്പെടുത്തി. കേസ് ഒത്തുതീര്‍പ്പാക്കാന്‍ പൊലിസുകാര്‍ ആവശ്യപ്പെട്ടതായും ഇരയായ യുവതി ആരോപിക്കുന്നുണ്ട്.

ഗുരുതരമായ ഈ കേസില്‍ പൊലിസിന്റെ ഭാഗത്തുനിന്ന് കടുത്ത വീഴ്ചകളാണ് ഉണ്ടായതെന്നാണ് യുവതിയുടെ ആക്ഷേപം. ആവര്‍ത്തിച്ച് ആവശ്യപ്പെട്ടിട്ടും അതിക്രമം നടന്ന് ആറ് ദിവസത്തിന് ശേഷമാണ് യുവതിയെ വൈദ്യപരിശോധനയ്ക്ക് വിധേയയാക്കിയത്. പൊലിസ് സ്റ്റേഷനില്‍ നിന്ന് മടങ്ങിയെത്തിയ യുവതിക്ക് നേരെ പ്രതി വീടുകയറി ആക്രമണം നടത്തുകയും ചെയ്തു. എഫ്.ഐ.ആര്‍ രജിസ്റ്റര്‍ ചെയ്ത് ദിവസങ്ങള്‍ കഴിഞ്ഞിട്ടും പ്രതിയെ അറസ്റ്റ് ചെയ്യാന്‍ മഡിവാള പൊലിസ് തയ്യാറായിട്ടില്ല. ഇപ്പോഴും പ്രതിയില്‍ നിന്നും കൂട്ടാളികളില്‍ നിന്നും തനിക്ക് നിരന്തരമായ ഭീഷണിയുണ്ടെന്ന് മലയാളി യുവതി മാധ്യമങ്ങളോട് പറഞ്ഞു.

A 20-year-old Malayali woman in Bengaluru was sexually assaulted by a Wayanad native, and she has accused the Madivala police of delaying action, failing to arrest the accused, and pressuring her to withdraw the case despite facing death threats.