അബുദബി: റോഡുകളിൽ സ്മാർട്ട് യാത്രാസംവിധാനങ്ങൾ പ്രോത്സാഹിപ്പിക്കുന്നതിന്റെ ഭാഗമായി ഓട്ടോണമസ് വാഹനങ്ങൾക്ക് മാത്രമായി പ്രത്യേക ലൈസൻസ് പ്ലേറ്റുകൾ അവതരിപ്പിച്ച് അബുദബി. പരീക്ഷണാടിസ്ഥാനത്തിൽ ഓടുന്നവയും വാണിജ്യ ആവശ്യങ്ങൾക്കായി ഉപയോഗിക്കുന്നതുമായ ഓട്ടോണമസ് വാഹനങ്ങൾക്കാണ് ഈ പ്രത്യേക പ്ലേറ്റുകൾ നൽകുന്നത്.

മുനിസിപ്പാലിറ്റികളുടെയും ഗതാഗത വകുപ്പിന്റെയും അനുബന്ധ സ്ഥാപനമായ ഇന്റഗ്രേറ്റഡ് ട്രാൻസ്‌പോർട്ട് സെന്റർ, സ്മാർട്ട് ആൻഡ് ഓട്ടോണമസ് സിസ്റ്റംസ് കൗൺസിലിന്റെ മേൽനോട്ടത്തിലാണ് പുതിയ സംരംഭം ആവിഷ്കരിച്ചിരിക്കുന്നത്.

റോഡുകളിൽ ഇത്തരം അത്യാധുനിക വാഹനങ്ങളെ പെട്ടെന്ന് തിരിച്ചറിയാനും കൃത്യമായ നിരീക്ഷണം ഉറപ്പാക്കാനും സഹായിക്കുന്നതാണ് ഇവയുടെ ഡിസൈൻ.

ലക്ഷ്യം മെച്ചപ്പെട്ട റോഡ് സുരക്ഷ

ഇമാറാത്തിലെ റോഡ് സുരക്ഷ വർദ്ധിപ്പിക്കുന്നതിനൊപ്പം ഗതാഗത വകുപ്പിനും ട്രാഫിക് പൊലിസിനും ഫീൽഡ് നിരീക്ഷണം എളുപ്പമാക്കാൻ ഈ നീല പ്ലേറ്റുകൾ സഹായിക്കും. അബുദബിയിലെ കർശനമായ സാങ്കേതിക-പ്രവർത്തന മാനദണ്ഡങ്ങൾ പാലിക്കുന്ന കമ്പനികൾക്ക് മാത്രമേ ഈ പ്ലേറ്റുകൾ അനുവദിക്കൂ.

ഡ്രൈവറില്ലാ ടാക്സികളും മറ്റ് വാഹനങ്ങളും അബുദാബിയിൽ സജീവമായിക്കൊണ്ടിരിക്കുന്ന സാഹചര്യത്തിൽ, ഭാവിയിലെ സുരക്ഷിത ഗതാഗത സംവിധാനങ്ങൾക്ക് ശക്തമായ അടിത്തറയിടാൻ ഈ പുതിയ ലൈസൻസിംഗ് ചട്ടക്കൂടിലൂടെ സാധിക്കുമെന്ന് അധികൃതർ പ്രത്യാശ പ്രകടിപ്പിച്ചു.

ALSO READ: സൂപ്പർമാർക്കറ്റുകളിലെ ഷെൽഫിലെ വിലയല്ല ബില്ലിൽ! വൻ പൊരുത്തക്കേടെന്ന് പരാതി; ഉപഭോക്താക്കൾക്ക് മുന്നറിയിപ്പുമായി എമിറേറ്റ്‌സ് കൺസ്യൂമർ പ്രൊട്ടക്ഷൻ അസോസിയേഷൻ

Abu Dhabi Mobility has introduced blue number plates to identify autonomous vehicles, marking a key step in regulating self-driving transport and supporting the emirate's vision for smart, safe, and innovative mobility solutions.