ഇസ്‌ലാമാബാദ്: ഇന്ത്യയില്‍ പെട്ടെന്ന് തരംഗമായി മാറിയ കോക്രോച്ച് ജനതാ പാര്‍ട്ടി പ്രസ്ഥാനം അതിര്‍ത്തി കടന്ന് പാകിസ്താനിലേക്കും. ഇന്ത്യയിലെ ഡിജിറ്റല്‍ കൂട്ടായ്മയ്ക്ക് സമാനമായി പാകിസ്താനിലെ സോഷ്യല്‍ മീഡിയയിലും നിരവധി പാരഡി അക്കൗണ്ടുകളാണ് ഉയര്‍ന്നുവരുന്നത്.
കോക്രോച്ച് അവാമി പാര്‍ട്ടി, കോക്രോച്ച് അവാമി ലീഗ്, മുത്താഹിദെ കോക്രോച്ച് മൂവ്‌മെന്റ് എന്നിങ്ങനെ വ്യത്യസ്ത പേരുകളിലാണ് പാകിസ്താനില്‍ അക്കൗണ്ടുകള്‍ പ്രത്യക്ഷപ്പെട്ടിരിക്കുന്നത്. 'യുവാക്കളുടെ രാഷ്ട്രീയ മുന്നണി, യുവാക്കളാല്‍, പാകിസ്താന് വേണ്ടി' എന്നാണ് കോക്രോച്ച് അവാമി പാര്‍ട്ടിയുടെ ബയോയില്‍ കുറിച്ചിരിക്കുന്നത്. 'ഭരണസംവിധാനം ആരെയാണോ പാറ്റകളായി കണ്ടത്, ആ ജനങ്ങളുടെ ശബ്ദമാണ് ഞങ്ങള്‍' എന്നാണ് മറ്റൊരു പേജിന്റെ വിവരണം.
ഇന്ത്യന്‍ പേജിന്റെ ലോഗോയോട് സാമ്യമുള്ളതും എന്നാല്‍ പാക് പതാകയെ അനുസ്മരിപ്പിക്കുന്നതുമായ പച്ചയും വെള്ളയും കലര്‍ന്ന ലോഗോയാണ് ഇവര്‍ ഉപയോഗിക്കുന്നത്. ഇമ്രാന്‍ ഖാന്റെ പാകിസ്താന്‍ തെഹ്രീകെ ഇന്‍സാഫ് (പി.ടി.ഐ), നവാസ് ഷെരീഫിന്റെ പാകിസ്താന്‍ മുസ്ലിം ലീഗ്, പാകിസ്താന്‍ പീപ്പിള്‍സ് പാര്‍ട്ടി (പി.പി.പി) തുടങ്ങിയ പരമ്പരാഗത രാഷ്ട്രീയ ശക്തികള്‍ക്കുള്ള ബദലായാണ് ഈ അക്കൗണ്ടുകള്‍ സ്വയം അടയാളപ്പെടുത്തുന്നത്.