ഉദുമ: ഓടിക്കൊണ്ടിരുന്ന ട്രെയിനിന് നേരെയുണ്ടായ കല്ലേറില്‍ യാത്രക്കാരിക്ക് ഗുരുതരമായി പരിക്കേറ്റു. കാസര്‍ഗോഡ് നീലേശ്വരം ആലികീഴ് സ്വദേശി സി. അനിത (48)യ്ക്കാണ് കണ്ണിന് പരിക്കേറ്റത്. ഇവരെ കാഞ്ഞങ്ങാട്ടെ സ്വകാര്യ ആശുപത്രിയില്‍ പ്രവേശിപ്പിച്ചു.

പള്ളിക്കര പൂച്ചക്കാട് സമീപത്ത് വെള്ളിയാഴ്ച ഉച്ചയ്ക്ക് 12.05നായിരുന്നു സംഭവം. ഇന്റര്‍സിറ്റി എക്‌സ്പ്രസ് ട്രെയിനിന് നേരെയാണ് കല്ലേറുണ്ടായത്.

മംഗളൂരുവിലെ ആശുപത്രിയില്‍ ചികിത്സയിലുള്ള മകനെ സന്ദര്‍ശിച്ച് നാട്ടിലേക്ക് മടങ്ങുകയായിരുന്ന അനിത ട്രെയിനിന്റെ മധ്യ ഭാഗത്തെ കമ്പാര്‍ട്ട്‌മെന്റിലായിരുന്നു ഇരുന്നത്. ജനല്‍ക്കമ്പിയില്‍ തട്ടി ശക്തമായി തെറിച്ചുവന്ന കല്ല് കണ്ണില്‍ പതിക്കുകയായിരുന്നു. ധരിച്ചിരുന്ന കണ്ണട പൊട്ടിയതിനെ തുടര്‍ന്ന് വലത് കണ്ണിന് താഴെ ആഴത്തില്‍ മുറിവേറ്റു.

സംഭവത്തില്‍ റെയില്‍വേ പൊലിസ് കേസെടുത്ത് അന്വേഷണം ആരംഭിച്ചു. സമീപത്തെ സിസിടിവി ദൃശ്യങ്ങള്‍ പരിശോധിച്ചപ്പോള്‍ കല്ലേറ് നടന്ന സമയത്ത് ഒരാള്‍ റെയില്‍വേ ട്രാക്കിലൂടെ നടന്നുപോകുന്നതായി കണ്ടെത്തി. എന്നാല്‍ 800 മീറ്ററോളം ദൂരെയുള്ള ക്യാമറ ദൃശ്യങ്ങളായതിനാല്‍ വ്യക്തമായ തിരിച്ചറിയല്‍ സാധ്യമായിട്ടില്ലെന്ന് റെയില്‍വേ എസ്.ഐ ഡി.എസ്. സനില്‍ കുമാര്‍ അറിയിച്ചു.

സംഭവത്തിന് പിന്നില്‍ മാനസികാസ്വാസ്ഥ്യമുള്ള ഒരാളാകാമെന്ന സംശയത്തിലാണ് പൊലിസ്. കല്ലേറ് നടന്ന സ്ഥലത്തിന് തൊട്ടടുത്തുള്ള കാഞ്ഞങ്ങാട് സ്‌റ്റേഷന്‍ മുതല്‍ ഏഴിമല വരെയുള്ള റെയില്‍വേ സ്റ്റേഷന്‍ പരിസരങ്ങളില്‍ അന്വേഷണം ശക്തമാക്കിയിട്ടുണ്ട്.