തിരുവനന്തപുരം: വാഹന മോഡിഫിക്കേഷനുമായി ബന്ധപ്പെട്ട റിപ്പോര്‍ട്ട് തയ്യാറാക്കല്‍ വേഗത്തിലാക്കി മോട്ടോര്‍ വാഹന വകുപ്പ്. മുഖ്യമന്ത്രി വി.ഡി. സതീശന്‍ ഉയര്‍ത്തിയ വിഷയത്തിന്റെ പശ്ചാത്തലത്തിലാണ് നടപടി. ശാസ്ത്രീയ പഠനങ്ങളുടെ അടിസ്ഥാനത്തിലായിരിക്കും റിപ്പോര്‍ട്ട് തയ്യാറാക്കുക. അടുത്ത മന്ത്രിസഭായോഗത്തില്‍ റിപ്പോര്‍ട്ട് സമര്‍പ്പിക്കാനാണ് സര്‍ക്കാര്‍ നീക്കം.

ഗതാഗത കമ്മീഷണറുടെ നേതൃത്വത്തില്‍ നടക്കുന്ന പഠനത്തില്‍ ഏതൊക്കെ തരത്തിലുള്ള വാഹന മോഡിഫിക്കേഷനുകള്‍ അനുവദിക്കാമെന്നത് പ്രത്യേകം ക്ലാസിഫൈ ചെയ്യും. റോഡ് സുരക്ഷയ്ക്ക് പ്രഥമ പരിഗണന നല്‍കിയാകും ഇളവുകള്‍ സംബന്ധിച്ച ശുപാര്‍ശകള്‍ മുന്നോട്ടുവയ്ക്കുക.

അതേസമയം കേന്ദ്ര മോട്ടോര്‍ വാഹന നിയമവും സുപ്രീംകോടതി വിധിയും സംസ്ഥാന സര്‍ക്കാരിന് മുന്നിലെ പ്രധാന വെല്ലുവിളികളായി തുടരുകയാണ്. റോഡ് സുരക്ഷയും പരിസ്ഥിതിയും ബാധിക്കുന്ന തരത്തിലുള്ള രൂപമാറ്റങ്ങള്‍ക്ക് ഇളവ് അനുവദിക്കാനാകില്ലെന്ന് സുപ്രീംകോടതി നേരത്തെ വ്യക്തമാക്കിയിരുന്നു. കേന്ദ്ര മോട്ടോര്‍ വാഹന നിയമത്തിലെ വകുപ്പ് 52 മറികടക്കുന്ന തരത്തില്‍ സംസ്ഥാനത്തിന് പ്രത്യേക ചട്ടങ്ങള്‍ രൂപീകരിക്കാനാകില്ലെന്നും അമിക്കസ് ക്യൂറി റിപ്പോര്‍ട്ട് ചെയ്തിട്ടുണ്ട്.

1988ലെ മോട്ടോര്‍ വാഹന നിയമത്തിലെ വകുപ്പ് 52 പ്രകാരം വാഹന നിര്‍മാതാക്കള്‍ അനുവദിക്കുന്ന പരിധിക്ക് പുറത്തുള്ള രൂപമാറ്റങ്ങള്‍ അനുവദനീയമല്ല. വാഹന മോഡിഫിക്കേഷനുകള്‍ക്ക് നിയന്ത്രണം ഏര്‍പ്പെടുത്തിയ 2006ലെ ഉത്തരവിനെതിരെ ഹൈക്കോടതി അനുകൂല വിധി പുറപ്പെടുവിച്ചിരുന്നുവെങ്കിലും, ആ ഉത്തരവ് റദ്ദാക്കി സുപ്രീംകോടതി 2019ല്‍ മോഡിഫിക്കേഷനുകള്‍ക്ക് വിലക്ക് ശക്തമാക്കിയിരുന്നു.