അബൂദബി: യു.എ.ഇയില്‍ ഇന്ന് പൊതുവെ തെളിഞ്ഞ കാലാവസ്ഥയായിരിക്കുമെന്ന് ദേശീയ കാലാവസ്ഥാ നിരീക്ഷണ കേന്ദ്രം (എന്‍.സി.എം). ഈദ് അല്‍ അദ്ഹ അവധിക്കാലത്ത് രാജ്യത്തുടനീളം താപനില ഉയരും.

അബൂദബിയില്‍ ഇന്ന് ഉയര്‍ന്ന താപനില 41 ഡിഗ്രി സെല്‍ഷ്യസും ദുബൈയില്‍ 39 ഡിഗ്രി സെല്‍ഷ്യസുമായിരിക്കും. ഷാര്‍ജയില്‍ പരമാവധി താപനില 40 ഡിഗ്രി സെല്‍ഷ്യസ് പ്രതീക്ഷിക്കുന്നു. എമിറേറ്റുകളില്‍ ഇന്ന് കുറഞ്ഞ താപനില യഥാക്രമം 28, 28, 25 എന്നിങ്ങനെയായിരിക്കും.

രാജ്യത്തിന്റെ ഉള്‍പ്രദേശങ്ങളില്‍ താപനില 47 വരെ എത്തുമെന്ന് പ്രതീക്ഷിക്കുന്നു. റാസല്‍ ഖൈമ പര്‍വതനിരകളില്‍ പോലും താപനില 28നും 31നും ഇടയിലായിരിക്കും.

ചില തീരപ്രദേശങ്ങളില്‍ രാത്രിയിലും വ്യാഴാഴ്ച രാവിലെയും ഈര്‍പ്പം കൂടുതലായിരിക്കും. തെക്ക് പടിഞ്ഞാറ് നിന്ന് വടക്ക് പടിഞ്ഞാറ് ദിശയില്‍ മണിക്കൂറില്‍ 10 മുതല്‍ 25 കിലോമീറ്റര്‍ വരെ വേഗതയില്‍ നേരിയതോ മിതമായതോ ആയ കാറ്റ് വീശും. കാറ്റിന്റെ വേഗത ചിലപ്പോള്‍ മണിക്കൂറില്‍ 35 കിലോമീറ്റര്‍ വരെ എത്തും. അറേബ്യന്‍ ഗള്‍ഫിലും ഒമാന്‍ കടലിലും കടല്‍ ശാന്തമായിരിക്കും.

English Summary: The National Center of Meteorology (NCM) has forecast generally clear weather across the UAE today, with temperatures expected to rise throughout the country during the Eid Al Adha holiday period.