തിരുവനന്തപുരം:  ബി.ബി.ഗോപകുമാറിനെ ബി.ജെ.പിയുടെ നിയമസഭ കക്ഷിനേതാവായി തെരഞ്ഞെടുത്തു. കക്ഷിനേതാവാകാനുള്ള സംസ്ഥാന പ്രസിഡന്റ് രാജീവ് ചന്ദ്രശേഖറും മുന്‍ കേന്ദ്രമന്ത്രി വി.മുരളീധരനും തമ്മിലുള്ള തര്‍ക്കങ്ങള്‍ക്കൊടുവിലാണ് സഭയിലെ ബി.ജെ.പിയുടെ മൂന്നാമത്തെ അംഗവും ചാത്തന്നൂരില്‍ നിന്നുള്ള എം.എല്‍.എയുമായ ബി.ബി. ഗോപകുമാറിനെ നിയമസഭ കക്ഷിനേതാവാക്കാന്‍ തീരുമാനമെടുത്തത്. 

സഭ സമ്മേളനം പുനരാരംഭിക്കുമ്പോള്‍ തീരുമാനം സ്പീക്കറെ അറിയിക്കും. ബി.ജെ.പി കോര്‍ കമ്മിറ്റി യോഗത്തില്‍ വി.മുരളീധരന്‍ കക്ഷിനേതാവാകണമെന്നായിരുന്നു ആവശ്യമുയര്‍ന്നത്. എന്നാല്‍ രാജീവ് ചന്ദ്രശേഖര്‍ കക്ഷിനേതാവാകാന്‍ അവകാശവാദമുന്നയിച്ചതോടെ ഇക്കാര്യത്തില്‍ തര്‍ക്കം ഉടലെടുത്തു. വി മുരളീധരന്‍ കക്ഷിനേതാവായാല്‍ രണ്ട് അധികാര സ്ഥാനം പാര്‍ട്ടിക്കുള്ളില്‍ രൂപപ്പെട്ടേക്കുമോയെന്ന വാദം ഉന്നയിച്ചാണ് രാജീവ് നീക്കം നടത്തിയത്. തര്‍ക്കം രൂക്ഷമായതോടെ രാജീവ് ചന്ദ്രശേഖറെയും വി.മുരളീധരനെയും വെട്ടി ബി.ബി. ഗോപകുമാറിനെ കക്ഷിനേതാവാക്കാന്‍ കേന്ദ്രം നിര്‍ദേശം നല്‍കുകയായിരുന്നു.