കോഴിക്കോട്: പിജി വിദ്യാര്‍ത്ഥികളുടെ പരാതിയെ തുടര്‍ന്ന് കോഴിക്കോട് മെഡിക്കല്‍ കോളജിലെ രണ്ട് അധ്യാപകര്‍ക്കെതിരെ അധികൃതരുടെ കര്‍ശന നടപടി. വിദ്യാര്‍ത്ഥികളെ മാനസികമായി പീഡിപ്പിച്ചെന്ന കണ്ടെത്തലിന്റെ അടിസ്ഥാനത്തില്‍ ഡോ. അനിതാ കുമാരി, ഡോ. സി.ഐ സ്മിത എന്നിവരെയാണ് സ്ഥലം മാറ്റിയത്. വിഷയത്തെക്കുറിച്ച് അന്വേഷിക്കാന്‍ രൂപീകരിച്ച പ്രത്യേക കമ്മീഷന്റെ റിപോര്‍ട്ടിന്മേലാണ് ഈ അടിയന്തര നടപടി.

പൊതുവേദികളിലും രോഗികളുടെ സാന്നിധ്യത്തിലും അധ്യാപകര്‍ തങ്ങളെ നിരന്തരം അപമാനിക്കാറുണ്ടെന്ന് ചൂണ്ടിക്കാട്ടി 12 പിജി വിദ്യാര്‍ത്ഥികളാണ് മെഡിക്കല്‍ കോളജ് പ്രിന്‍സിപ്പലിനും പിജി ഗ്രീവന്‍സ് സെല്ലിനും പരാതി നല്‍കിയത്. മാസങ്ങളായി തുടരുന്ന ഈ പരസ്യ അധിക്ഷേപവും മാനസിക പീഡനവും കാരണം സഹപാഠികളില്‍ പലരും കടുത്ത വിഷാദരോഗത്തിന് അടിമപ്പെട്ടതായും വിദ്യാര്‍ത്ഥികള്‍ പരാതിയില്‍ വ്യക്തമാക്കിയിരുന്നു. വിദ്യാര്‍ത്ഥികളുടെ ഭാവി കണക്കിലെടുത്ത് അധ്യാപകര്‍ക്കെതിരെ അടിയന്തര നടപടി വേണമെന്ന ആവശ്യമാണ് ഇപ്പോള്‍ സ്ഥലംമാറ്റത്തില്‍ കലാശിച്ചത്.

Following complaints from 12 PG students about ongoing mental harassment and public humiliation, two professors from Kozhikode Medical College have been transferred based on an enquiry report.