അബുദബി: യുഎഇ ഫെഡറല്‍ അതോറിറ്റി ഫോര്‍ ന്യൂക്ലിയര്‍ റെഗുലേഷന്റെ (FANR) പുതിയ ഡയറക്ടര്‍ ജനറലായി ഹമദ് അലി മുഹമ്മദ് അല്‍ കാബിയെ യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ നിയമിച്ചു. ഞായറാഴ്ചയാണ് ഇത് സംബന്ധിച്ച ഫെഡറല്‍ ഉത്തരവ് പ്രസിഡന്റ് പുറപ്പെടുവിച്ചത്.
ആണവോര്‍ജ്ജം, ആണവ സുരക്ഷ, ആണവായുധ വ്യാപന നിരോധനം എന്നീ മേഖലകളില്‍ അന്താരാഷ്ട്ര സംഘടനകളുമായും വിവിധ രാജ്യങ്ങളിലെ സര്‍ക്കാരുകളുമായും ഉള്ള യുഎഇയുടെ പ്രധാന ആശയവിനിമയ പ്രതിനിധിയായി അല്‍ കാബി പ്രവര്‍ത്തിച്ചിട്ടുണ്ട്. അന്താരാഷ്ട്ര ആണവോര്‍ജ്ജ ഏജന്‍സിയിലടക്കം (IAEA) യുഎഇയെ പ്രതിനിധീകരിച്ച അദ്ദേഹം മുന്‍പ് ഫെഡറല്‍ അതോറിറ്റി ഫോര്‍ ന്യൂക്ലിയര്‍ റെഗുലേഷന്റെ ബോര്‍ഡ് ഓഫ് മാനേജ്‌മെന്റ് ഡെപ്യൂട്ടി ചെയര്‍മാനായും സേവനമനുഷ്ഠിച്ചിട്ടുണ്ട്. അമേരിക്കയിലെ പര്‍ഡ്യൂ സര്‍വകലാശാലയില്‍ നിന്ന് ന്യൂക്ലിയര്‍ എഞ്ചിനീയറിംഗില്‍ ബാച്ചിലേഴ്‌സ്, മാസ്റ്റേഴ്‌സ് ബിരുദങ്ങള്‍ നേടിയിട്ടുണ്ട്. യുഎഇയുടെ നയതന്ത്ര ബന്ധങ്ങള്‍ ശക്തിപ്പെടുത്തുന്നതില്‍ നല്‍കിയ സംഭാവനകള്‍ പരിഗണിച്ച് ഇദ്ദേഹത്തിന് 'ഓര്‍ഡര്‍ ഓഫ് സായിദ് സെക്കന്‍ഡ് ക്ലാസ്' ബഹുമതി ലഭിച്ചിരുന്നു.
2015 മുതല്‍ ഈ പദവിയിലുണ്ടായിരുന്ന ക്രിസ്റ്റര്‍ വിക്ടേഴ്‌സണ് പകരമാണ് അല്‍ കാബിയുടെ നിയമനം. യുഎഇയിലെ ആണവ സുരക്ഷ, റേഡിയേഷന്‍ സംരക്ഷണം, ആഗോള ആണവ കരാറുകള്‍ നടപ്പിലാക്കല്‍ എന്നിവയുടെ മേല്‍നോട്ടം വഹിക്കുന്ന സ്വതന്ത്ര നിയന്ത്രണ സമിതിയാണ് ഫെഡറല്‍ അതോറിറ്റി ഫോര്‍ ന്യൂക്ലിയര്‍ റെഗുലേഷന്‍. രാജ്യത്തെ ആണവോര്‍ജ്ജ നിലയങ്ങളുടെ രൂപകല്‍പ്പന, നിര്‍മ്മാണം, പ്രവര്‍ത്തനം തുടങ്ങിയവയെല്ലാം നിയന്ത്രിക്കുന്നത് ഈ സമിതിയാണ്.

Summary: UAE President Sheikh Mohamed bin Zayed Al Nahyan has issued a federal decree appointing Hamed Ali Mohammed Al Kaabi as the new Director General of the Federal Authority for Nuclear Regulation (FANR).