കല്‍പ്പറ്റ: വയനാട് ജില്ലയില്‍ ഷിഗെല്ല രോഗം സ്ഥിരീകരിച്ച സാഹചര്യത്തില്‍ പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കി ആരോഗ്യവകുപ്പ്. രോഗബാധയേറ്റ് കോളിയാടി സ്‌കൂളിലെ കുട്ടികളുടെ കുടുംബാംഗങ്ങള്‍ക്ക് ജാഗ്രത നിര്‍ദേശം നല്‍കിയിട്ടുണ്ട്. രോഗലക്ഷണം കാണുകയാണെങ്കില്‍ ഉടന്‍ ചികിത്സ തേടാനാണ് നിര്‍ദേശം. 

പ്രദേശത്തെ വീടുകളിലെ കിണറുകള്‍ ക്ലോറിനേറ്റ് ചെയ്യാന്‍ ഉത്തരവിട്ടിട്ടുണ്ട്. കോളിയാടി സ്‌കൂളിലെ കുട്ടികളുടെ സഹോദരങ്ങള്‍ പഠിക്കുന്ന സ്‌കൂളുകളിലും നിരീക്ഷണം ഏര്‍പ്പെടുത്തിയിട്ടുണ്ട്. രോഗബാധ സ്ഥിരീകരിച്ച സാഹചര്യത്തില്‍ ജില്ലയിലെ സ്‌കൂളുകളിലെ കിണറുകളില്‍ പരിശോധന കര്‍ശനമാക്കാനാണ് തീരുമാനം. 

രോഗബാധയുടെ പശ്ചാത്തലത്തില്‍ ജില്ലയില്‍ ഇന്ന് ആരോഗ്യ വകുപ്പ് പ്രത്യേക യോഗം ചേരും. ആരോഗ്യ മന്ത്രി കെ മുരളീധരന്‍ വൈകീട്ടോടെ വയനാട്ടിലെത്തും. കൃഷിമന്ത്രി ടി സിദ്ദീഖിന്റെ നേതൃത്വത്തിലാണ് യോഗം. 

രോഗലക്ഷണങ്ങളുമായി 60 കുട്ടികളാണ് ആശുപത്രിയില്‍ ചികിത്സയിലുള്ളത്. പനി,ഛര്‍ദ്ദി, വയറിളക്കം തുടങ്ങിയ രോഗലക്ഷണങ്ങളുമായി കഴിഞ്ഞ ഒരാഴ്ചയ്ക്കിടെ സ്‌കൂളിലെ 339 കുട്ടികള്‍ ആശുപത്രികളില്‍ ചികിത്സ തേടിയിരുന്നു. ഇതില്‍ 21 സാമ്പിളുകള്‍ പരിശോധനയ്ക്ക് അയച്ചതില്‍ രണ്ടെണ്ണമാണ് പോസിറ്റീവ് ആയത്. എല്ലാവരുടെയും ആരോഗ്യസ്ഥിതി സാധാരണ നിലയില്‍ ആണെന്നും ആശങ്കപ്പെടേണ്ട സാഹചര്യമില്ലെന്നും ജില്ലാ ഭരണകൂടം അറിയിച്ചു.