ന്യൂയോര്‍ക്ക്: ഫിഫ ലോകകപ്പില്‍ സ്വപ്‌നക്കുതിപ്പിനായി ഒരുങ്ങുന്ന മൊറോക്കന്‍ ടീമിന് കനത്ത തിരിച്ചടി. മുന്‍ ബാഴ്‌സലോണ താരവും ടീമിന്റെ പ്രധാന സ്‌ട്രൈക്കര്‍മാരിലുമൊരാളായ അബ്ദെ എസല്‍സൗദിയും മാഴ്‌സ ക്ലബ് പ്രതിരോധ താരം നായെഫ് അഗ്വേര്‍ഡും പരുക്കേറ്റ് പുറത്ത്. റിയല്‍ ബെറ്റിസിനെ അടുത്ത സീസണ്‍ ചാംപ്യന്‍സ് ലീഗിന് യോഗ്യത നേടിക്കൊടുക്കുന്നതില്‍ പ്രധാനിയായ എസല്‍സൗലിക്ക് നോര്‍വെയ്‌ക്കെതിരായ ലോകകപ്പ് സൗഹൃദ മത്സരത്തിലാണ് പരുക്കേറ്റത്. ഇക്കഴിഞ്ഞ ഖത്തര്‍ ലോകകപ്പില്‍ ടീമിനെ ചരിത്രത്തിലാദ്യമായ സെമി ഫൈനലില്‍ എത്തിക്കുന്നതില്‍ നിര്‍ണായക പങ്കുവഹിച്ച താരമാണ് അഗ്വേര്‍ഡ്. ഇരുവര്‍ക്കും പകരക്കാരായി അമിനെ സബായിയെയും മര്‍വെയ്ന്‍ സാദാനെയെയും ഉള്‍പ്പെടുത്തി. 

ALSO READ: ഫിഫ ലോകകപ്പ് 2026 ഇന്ന് മുതൽ; ലോകവേദിയിൽ പന്തുതട്ടാൻ നാല് ഇന്ത്യൻ വംശജർ, ഖത്തറിനായി മലയാളി താരവും
ശനിയാഴ്ച ന്യൂയോര്‍ക്കിലെ മെറ്റ്‌ലൈഫ് സ്റ്റേഡിയത്തില്‍ നടക്കുന്ന ഗ്രൂപ്പ് സിയിലെ ടീമിന്റെ ആദ്യ മത്സരത്തില്‍ കരുത്തരായ ബ്രസീലാണ് മൊറോക്കോയുടെ എതിരാളി. ശേഷം 19ന് സ്‌കോട്ട്‌ലന്‍ഡിനെതിരേയും 24ന് ഹെയ്തിക്കെതിരേയും മൊറോക്കോയ്ക്ക് മത്സരമുണ്ട്.