ഷാർജ: ഷാർജയിലെ വിവിധ ഭാഗങ്ങളിൽ പ്രധാന റോഡ് വികസന പദ്ധതികളും ഗതാഗത വഴിതിരിച്ചുവിടലുകളും ആരംഭിച്ചതോടെ ദിവസേനയുള്ള യാത്ര സുഗമമാക്കാൻ പുതിയ വഴികൾ തേടി താമസക്കാർ. ദീർഘകാലാടിസ്ഥാനത്തിൽ ഗതാഗതക്കുരുക്ക് ലഘൂകരിക്കാൻ ലക്ഷ്യമിട്ടുള്ള അൽ താവൂൻ ടണൽ പദ്ധതി ഉൾപ്പെടെയുള്ള നിർമ്മാണ പ്രവർത്തനങ്ങളാണ് ഇപ്പോൾ പുരോഗമിക്കുന്നത്. എന്നാൽ പദ്ധതികൾ പൂർത്തിയാകാൻ മാസങ്ങളെടുക്കുമെന്നതിനാൽ, നിലവിലെ കടുത്ത ഗതാഗതക്കുരുക്കിൽ വലയുകയാണ് ദുബൈ-ഷാർജ യാത്രക്കാർ.

പ്രത്യേകിച്ച് വൈകുന്നേരങ്ങളിലെ തിരക്കേറിയ സമയങ്ങളിൽ റോഡിൽ മണിക്കൂറുകളോളമാണ് വാഹനങ്ങൾ കിടക്കുന്നത്. ഈ സാഹചര്യത്തോട് പൊരുത്തപ്പെടാൻ ദിനചര്യകളിൽ മാറ്റം വരുത്തുകയാണ് പലരും.

ബുഹൈറയിൽ താമസിച്ച് ദുബൈയിൽ ജോലി ചെയ്യുന്ന അബ്ബാസ് എന്ന യാത്രക്കാരന് കഴിഞ്ഞ വ്യാഴാഴ്ച വീട്ടിലെത്താൻ രണ്ട് മണിക്കൂറിലധികം സമയമാണ് എടുത്തത്. പരാതി പറയുന്നതിനേക്കാൾ നല്ലത് സാഹചര്യങ്ങളുമായി പൊരുത്തപ്പെടുകയാണെന്ന് അദ്ദേഹം പറയുന്നു. ട്രാഫിക് ബ്ലോക്ക് ഒഴിവാക്കാൻ ഓഫീസിൽ നേരത്തെ എത്താനും അല്പം വൈകി ഇറങ്ങാനുമാണ് അദ്ദേഹത്തിന്റെ തീരുമാനം. കൂടാതെ ഗൂഗിൾ മാപ്പ് നോക്കി ദൂരം കൂടുതലാണെങ്കിലും തടസ്സമില്ലാതെ വണ്ടിയോടിക്കാൻ പറ്റുന്ന ബദൽ ഉൾറോഡുകളും അദ്ദേഹം പരീക്ഷിക്കുന്നുണ്ട്.

അൽ താവൂനിൽ താമസിക്കുന്ന ഇമാദ് അൽ ഫാഖി എന്ന പ്രവാസിയുടെ രീതി മറ്റൊന്നാണ്. ജോലി കഴിഞ്ഞയുടൻ ബ്ലോക്കിലേക്ക് വണ്ടിയെടുക്കുന്നതിന് പകരം അൽ ഖുവോസിലെ ഓഫീസിന് അടുത്തുള്ള ജിമ്മിൽ പോയി വ്യായാമം ചെയ്യാനാണ് അദ്ദേഹം പദ്ധതിയിടുന്നത്. വ്യായാമം കഴിയുമ്പോഴേക്കും റോഡിലെ തിരക്ക് കുറയുമെന്നത് സമയം ലാഭിക്കാനും ആരോഗ്യസംരക്ഷണത്തിനും സഹായിക്കുമെന്ന് അദ്ദേഹം കരുതുന്നു.

ഫ്ലെക്സിബിൾ ജോലി സമയത്തിനായി ജീവനക്കാർ

നിർമ്മാണ പ്രവർത്തനങ്ങൾ നടക്കുന്ന ഈ കാലയളവിൽ തൊഴിലുടമകൾ ജോലി സമയത്തിൽ ഇളവുകൾ നൽകുമെന്ന പ്രതീക്ഷയിലാണ് ജീവനക്കാർ. ഷാർജയിൽ താമസിച്ച് ദെയ്റയിൽ അക്കൗണ്ടന്റായി ജോലി ചെയ്യുന്ന അങ്കിത് റാം തന്റെ ഓഫീസ് സമയം ക്രമീകരിക്കാൻ മാനേജറോട് ആവശ്യപ്പെടാൻ ഒരുങ്ങുകയാണ്.

"ട്രാഫിക് ഏറ്റവും മോശമാകുന്ന സമയം ഒഴിവാക്കാൻ 30 മിനിറ്റ് നേരത്തെയോ അല്ലെങ്കിൽ വൈകിയോ ഇറങ്ങുന്നത് റോഡിലെ ഒരു മണിക്കൂറോളം ലാഭിക്കാൻ സഹായിക്കും. നീണ്ട യാത്രാ സമയം ജീവനക്കാരുടെ ഉൽപ്പാദനക്ഷമതയെ മാത്രമല്ല, ജോലി കഴിഞ്ഞ് കുടുംബത്തോടൊപ്പം ചെലവഴിക്കുന്ന സമയത്തെയും ബാധിക്കുന്നുണ്ട്." അങ്കിത് റാം വ്യക്തമാക്കി.

റോഡ് വികസന പദ്ധതികൾ പൂർത്തിയാകുന്നതോടെ ഇമാറാത്തിലെ ഗതാഗത സംവിധാനം കൂടുതൽ മികച്ചതാകുമെങ്കിലും, അടുത്ത കുറച്ചു മാസങ്ങളിലേക്ക് യാത്രക്കാർ കൃത്യമായ ആസൂത്രണത്തോടെയും ക്ഷമയോടെയും ഇരിക്കേണ്ടി വരുമെന്ന് ഉറപ്പാണ്.

ALSO READ: 'അതെ, ഇതൊരു തട്ടിപ്പാണ്'; കോളർ ഐഡി സ്പൂഫിംഗ് ഉപയോ​ഗിച്ച് യുഎഇയിൽ പുതിയ തരം തട്ടിപ്പ്; ജാഗ്രതാ നിർദ്ദേശവുമായി സുരക്ഷാ വിദഗ്ധർ

Motorists travelling between Sharjah and Dubai are facing significant delays due to ongoing Al Taawun Tunnel construction work. Authorities have advised commuters to use alternative routes and adjust travel timings to avoid congestion.