തൃശൂര്‍: ബി.ജെ.പി തൃശൂര്‍ ജില്ലാ സൗത്ത് പ്രസിഡന്റ് എ. ശ്രീകുമാറിനെതിരെ വീണ്ടും പൊലിസ് കേസ് രജിസ്റ്റര്‍ ചെയ്തു. തന്നെ മര്‍ദ്ദിച്ചെന്ന് കാണിച്ച് പൊലിസില്‍ പരാതി നല്‍കിയ ഭാര്യയെ, ഗുണ്ടയെ ഉപയോഗിച്ച് ഭീഷണിപ്പെടുത്തിയെന്നാണ് പുതിയ കേസ്. സംഭവവുമായി ബന്ധപ്പെട്ട് ശ്രീകുമാറിന്റെ നിര്‍ദേശപ്രകാരം ഭീഷണി മുഴക്കിയ പെരിഞ്ഞനം സ്വദേശിയായ ഗുണ്ട ഗിരീഷിനെ (50) പൊലിസ് അറസ്റ്റ് ചെയ്തു.

വൈകി വീട്ടിലെത്തിയെന്ന് ആരോപിച്ച് ശ്രീകുമാര്‍ തന്നെ ക്രൂരമായി മര്‍ദ്ദിച്ചതായി കാണിച്ച് ഭാര്യ നേരത്തെ പരാതി നല്‍കിയിരുന്നു. ഈ കേസില്‍ ശ്രീകുമാറിനെതിരെ പൊലിസ് നടപടിയെടുത്തിരുന്നെങ്കിലും അദ്ദേഹത്തെ അറസ്റ്റ് ചെയ്യരുതെന്ന് സെഷന്‍സ് കോടതി നിര്‍ദ്ദേശിച്ചിരുന്നു. ഇതിന് പിന്നാലെയാണ് മാധ്യമങ്ങള്‍ക്ക് മുന്നില്‍ ഭര്‍ത്താവിനെതിരെ സംസാരിക്കരുതെന്ന് ആവശ്യപ്പെട്ട് ഗിരീഷ് എന്ന ഗുണ്ടയെ വിട്ട് ശ്രീകുമാര്‍ ഭാര്യയെ ഭീഷണിപ്പെടുത്തിയത്.

ഭീഷണിയെത്തുടര്‍ന്ന് ഭാര്യ വീണ്ടും പൊലിസിനെ സമീപിക്കുകയായിരുന്നു. ആദ്യ കേസില്‍ കോടതിയുടെ സംരക്ഷണം ഉണ്ടായിരുന്നതിനാല്‍ ശ്രീകുമാറിനെതിരെ കൂടുതല്‍ നടപടികളിലേക്ക് കടക്കാന്‍ പൊലിസിന് കഴിഞ്ഞിരുന്നില്ല. എന്നാല്‍ ഗുണ്ടയെ വിട്ട് സാക്ഷിയെ ഭീഷണിപ്പെടുത്തിയ പുതിയ കേസിന്റെ പശ്ചാത്തലത്തില്‍, ബി.ജെ.പി നേതാവിനെതിരെ ശക്തമായ നിയമ നടപടികളുമായി മുന്നോട്ട് പോവാനാണ് തൃശൂര്‍ പൊലിസിന്റെ തീരുമാനം.

Thrissur police have registered a fresh case against BJP South District President A. Sreekumar for allegedly hiring a goon to threaten his wife after she filed a domestic violence complaint against him.