ന്യൂഡല്‍ഹി: ഷൂ വാങ്ങിയ ഉപഭോക്താവില്‍ നിന്ന് പേപ്പര്‍ ബാഗിനായി 10 രൂപ ഈടാക്കിയ സംഭവത്തില്‍ ഫൂട്ട് വെയര്‍ ബ്രാന്‍ഡായ റെഡ് ടേപ്പിന് പിഴയിട്ട് ഉപഭോക്തൃ കോടതി. കവറിന് പണമീടാക്കിയത് സേവനത്തിലെ വീഴ്ച്ചയാണെന്ന് ചൂണ്ടിക്കാട്ടിയാണ് കമ്പനി 8000 രൂപ പിഴ നല്‍കാന്‍ ഹരിയാന റോത്തക്കിലെ ഉപഭോക്തൃ കോടതി ഉത്തരവിട്ടത്. 30 ദിവസത്തിനകം നഷ്ടപരിഹാര തുക കൈമാറാനാണ് നിര്‍ദേശം. 

2023 ഏപ്രിലിലാണ് പരാതിക്കാരന്‍ റോത്തക്കിലെ റെഡ് ടേപ്പ് ഔട്ട്‌ലറ്റില്‍ നിന്ന് 2069 രൂപയ്ക്ക് ഷൂ വാങ്ങിയത്. ഷൂ ഇടാനായി കൊടുത്ത പേപ്പര്‍ ബാഗിന് 10 രൂപ സ്ഥാപനം ഈടാക്കി. പരാതിക്കാരന്‍ ഇത് ചോദ്യം ചെയ്‌തെങ്കിലും പണം ഈടാക്കിയത് കമ്പനി പോളിസിയാണെന്നായിരുന്നു ജീവനക്കാരുടെ മറുപടി. തുടര്‍ന്നാണ് പരാതിക്കാരന്‍ ഉപഭോക്തൃ കോടതിയെ സമീപിച്ചത്. 

പേപ്പര്‍ ബാഗിന് ഈടാക്കിയ പത്ത് രൂപ തിരികെ വേണമെന്നും 50000 രൂപ നഷ്ടപരിഹാരമായും, 22000 രൂപ കോടതിച്ചെലവായും വേണമെന്നായിരുന്നു പരാതിയിലെ ആവശ്യം. പരാതി റെഡ് ടേപ്പ് എതിര്‍ത്തു. പേപ്പര്‍ ബാഗ് ഉപയോഗിക്കുന്നത് പരിസ്ഥിതി സൗഹൃദ സമീപനത്തിന്റെ ഭാഗമായാണെന്നും, അതിന്റെ ദുരുപയോഗം കുറയ്ക്കാന്‍ വേണ്ടിയാണ് പണം ഈടാക്കുന്നതെന്നും കമ്പനി വാദിച്ചു. ബാഗില്‍ കമ്പനിയുടെ ബ്രാന്‍ഡ് നെയിമോ, ലോഗോയോ പതിച്ചിട്ടില്ലെന്നും, പേപ്പര്‍ ബാഗ് വാങ്ങാന്‍ ഉപഭോക്താവിനെ നിര്‍ബന്ധിച്ചിട്ടില്ലെന്നും കമ്പനി കോടതിയെ അറിയിച്ചു. 

എന്നാല്‍ ഈ വാദങ്ങള്‍ തള്ളിയ കോടതി പരാതിക്കാരന് അനുകൂലമായി വിധി പുറപ്പെടുവിക്കുകയായിരുന്നു. കടയില്‍ നിന്ന് വാങ്ങിയ ഉല്‍പ്പന്നമായ ഷൂ കൊണ്ടുപോകാന്‍ ബാഗിന് പണം ഈടാക്കുന്നത് സേവനത്തിലെ വീഴ്ച്ചയാണെന്ന് കോടതി നിരീക്ഷിച്ചു. തുടര്‍ന്ന് അന്യായമായി വാങ്ങിയ പത്തുരൂപ റീഫണ്ട് ചെയ്യാനും, സേവനത്തിലെ വീഴ്ച്ചയ്ക്ക് 4000 രൂപയും, കോടതിച്ചെലവിനായി 4000 രൂപയും ഉള്‍പ്പെടെ 8010 രൂപ പരാതിക്കാരന് കൈമാറാനും കോടതി ഉത്തരവിട്ടു. 30 ദിവസത്തിനകം നഷ്ടപരിഹാരം കൈമാറിയില്ലെങ്കില്‍ ഓരോ ആഴ്ച്ചയും 50 രൂപ വീതം പിഴയായി ഈടാക്കുമെന്നും ഉത്തരവില്‍ പറയുന്നു.