ലണ്ടൻ: ലോകകപ്പ് മത്സരങ്ങൾ പുരോഗമിക്കുന്നതിനിടെ തന്റെ ആദ്യ കുഞ്ഞിന്റെ ജനനസമയത്ത് ഭാര്യയോടൊപ്പം ചിലവഴിക്കാൻ ക്യാംപ് വിട്ടുപോകുമെന്ന ബെൽജിയം വിംഗർ ജെറമി ഡോക്കുവിന്റെ പ്രഖ്യാപനവും, അതിനെത്തുടർന്ന് ഫ്രഞ്ച് മാധ്യമപ്രവർത്തക നടത്തിയ വിവാദ പരാമർശവും കായികലോകത്ത് വലിയ ചർച്ചയാകുന്നു. മാഞ്ചസ്റ്റർ സിറ്റിയുടെ സൂപ്പർ താരമായ ഡോക്കുവിനെ പിന്തുണച്ച് കളിക്കാരും പരിശീലകരും ഫുട്‌ബോൾ സംഘടനകളും ഒന്നടങ്കം രംഗത്തെത്തിയിരിക്കുകയാണ്.

അടുത്ത മാസം ഡോക്കുവിന്റെ ഭാര്യ ഷിറീൻ ആദ്യ കുഞ്ഞിന് ജന്മം നൽകാനിരിക്കെ, ബെൽജിയം ലോകകപ്പിന്റെ ക്വാർട്ടർ ഫൈനലിൽ പ്രവേശിച്ചാൽ പോലും താൻ ഭാര്യയുടെ അരികിലേക്ക് മടങ്ങുമെന്നാണ് 24കാരനായ താരം വ്യക്തമാക്കിയത്. എന്നാൽ, ഫ്രഞ്ച് ചാനലായ 'എൽ എക്വിപ്' അവതാരക ഫ്രാൻസ് പിയറോൺ ഇതിനെതിരേ കടുത്ത ഭാഷയിൽ പ്രതികരിച്ചു. പ്രസവസമയത്ത് ഒരു പിതാവ് അവിടെ 'തികച്ചും നിഷ്പ്രയോജനമാണെന്നും' പ്രസവമെന്നത് 'അരോചകമായ ഒരു നിമിഷം' ആണെന്നുമായിരുന്നു അവതാരകയുടെ തത്സമയ പ്രതികരണം. ഇത് കായികരംഗത്തും സമൂഹമാധ്യമങ്ങളിലും വലിയ പ്രതിഷേധത്തിന് കാരണമായതോടെ ചാനലിന് പരസ്യമായി മാപ്പ് പറയേണ്ടി വന്നു.

'ഗ്ലാഡിയേറ്റർമാരല്ല കളിക്കാർ'; ഡോക്കുവിന് കായികലോകത്തിന്റെ പിന്തുണ

സംഭവം വിവാദമായതോടെ ഡോക്കുവിന് പിന്തുണയുമായി ഇംഗ്ലണ്ട് താരം ഒല്ലി വാറ്റ്കിൻസ് ഉൾപ്പെടെയുള്ള പ്രമുഖർ രംഗത്തെത്തി. പ്രസവത്തെ 'അരോചകം' എന്ന് വിളിച്ചതിനെ ശക്തമായി അപലപിച്ച വാറ്റ്കിൻസ്, തന്റെ ആദ്യ കുഞ്ഞിന്റെ ജനനത്തിന് സാക്ഷിയാകുന്നത് ജീവിതത്തിലെ ഏറ്റവും വലിയ ഭാഗ്യമാണെന്നും ഡോക്കുവിന്റെ തീരുമാനത്തെ പൂർണ്ണമായി പിന്തുണയ്ക്കുന്നുവെന്നും വ്യക്തമാക്കി. കളിക്കാരെ വെറും അത്‌ലറ്റുകളായല്ല, മനുഷ്യരായി കാണാൻ ഫുട്‌ബോൾ ലോകം തയാറാകണമെന്ന് പ്രൊഫഷണൽ ഫുട്‌ബോളേഴ്‌സ് അസോസിയേഷനും ആവശ്യപ്പെട്ടു. നാം കളിക്കാരെ റോമിലെ കൊളോസിയത്തിലെ ഗ്ലാഡിയേറ്റർമാരെപ്പോലെ വെറും വിനോദോപാധിയായി കാണരുതെന്നും അവർക്ക് പണത്തേക്കാൾ വിലപ്പെട്ടതാണ് കുടുംബമെന്നും ഫാദർഹുഡ് ഇൻസ്റ്റിറ്റ്യൂട്ടിലെ ജെറമി ഡേവിസ് പ്രതികരിച്ചു.

ALSO READ: ആദ്യ മത്സരത്തിൽ ഗോൾ സ്‌കോറർ ലോകകപ്പിൽനിന്ന് പുറത്ത്; ജർമനിക്ക് കനത്ത തിരിച്ചടി

കരിയറോ കുടുംബമോ? ഫുട്‌ബോളിലെ മുൻകാല മാതൃകകൾ

മുൻപ് 2018 ലോകകപ്പിനിടെ ഇംഗ്ലണ്ട് താരം ഫാബിയൻ ഡെൽഫ് ക്യാംപ് വിട്ട് നാട്ടിലേക്ക് മടങ്ങിയതും, ഡേവിഡ് ഡി ഹിയക്ക് മാഞ്ചസ്റ്റർ യുനൈറ്റഡ് പ്രത്യേക അവധി നൽകിയതും ഫുട്‌ബോൾ ലോകം മാതൃകകളായി ചൂണ്ടിക്കാണിക്കുന്നുണ്ട്. അതേസമയം, യാത്രാവിലക്കുകൾ കാരണം റൂബൻ നെവസ് തുടങ്ങിയ താരങ്ങൾക്ക് തങ്ങളുടെ കുഞ്ഞുങ്ങളുടെ ജനനം ടീം ബസിലിരുന്ന് ഫോൺ സ്‌ക്രീനിലൂടെ കാണേണ്ടി വന്ന കഠിനമായ സാഹചര്യവും മുൻപുണ്ടായിട്ടുണ്ട്. പ്രൊഫഷണൽ ഫുട്‌ബോളിലെ കടുത്ത സമ്മർദ്ദങ്ങൾക്കിടയിലും കരിയറിനേക്കാൾ കുടുംബത്തിന് പ്രാധാന്യം നൽകാൻ കാണിച്ച ഡോക്കുവിന്റെ നിലപാടിനൊപ്പമാണ് ഇന്ന് കായികലോകം ഒന്നടങ്കം നിലയുറപ്പിക്കുന്നത്.

Jeremy Doku has made it clear - family comes first