തൃശൂര്‍: ചാലക്കുടി സമ്പാളൂരില്‍ നാട്ടുകാരെയും സുരക്ഷാ ഉദ്യോഗസ്ഥരെയും മണിക്കൂറുകളോളം മുള്‍മുനയില്‍ നിര്‍ത്തി യുവാവിന്റെ ആത്മഹത്യാ ഭീഷണി. ഒടുവില്‍ പള്ളി വികാരിയുടെ സമയോചിതമായ ഇടപെടലിനെ തുടര്‍ന്ന് യുവാവ് സുരക്ഷിതമായി താഴെയിറങ്ങി. സമ്പാളൂര്‍ സെന്റ് ഫ്രാന്‍സിസ് സേവ്യര്‍ തീര്‍ത്ഥാടന കേന്ദ്രത്തിലെ വാട്ടര്‍ ടാങ്കിന് മുകളിലാണ് ചൊവ്വാഴ്ച ഉച്ചയോടെ നാടകീയ രംഗങ്ങള്‍ അരങ്ങേറിയത്. ചേര്‍ത്തല സ്വദേശിയായ പ്രിന്‍സ് (42) എന്ന യുവാവാണ് ജീവനൊടുക്കാന്‍ ശ്രമിച്ചത്.

യുവാവ് ടാങ്കിന് മുകളില്‍ കയറിയതോടെ നാട്ടുകാരും പള്ളിയിലെത്തിയ വിശ്വാസികളും പരിഭ്രാന്തരായി. വിവരമറിഞ്ഞ് പൊലിസും ഫയര്‍ഫോഴ്‌സും സ്ഥലത്തെത്തി താഴെയിറക്കാന്‍ പരമാവധി ശ്രമിച്ചെങ്കിലും യുവാവ് വഴങ്ങിയില്ല. ഈ സമയം രൂപതയുടെ യോഗത്തില്‍ പങ്കെടുക്കുകയായിരുന്ന പള്ളി വികാരി ഫാ. ജോണ്‍സണ്‍ പങ്കേത്ത് വിവരമറിഞ്ഞ് ഉടന്‍ തന്നെ പള്ളിയിലേക്ക് തിരിച്ചെത്തി.

തുടര്‍ന്ന് അദ്ദേഹം ടെറസിന് മുകളില്‍ കയറി യുവാവിനോട് സംസാരിക്കുകയും സ്‌നേഹത്തോടെ അനുനയിപ്പിക്കാന്‍ ശ്രമിക്കുകയും ചെയ്തു. ആദ്യമൊക്കെ ശാഠ്യം പിടിച്ചെങ്കിലും വികാരിയുടെ ആശ്വാസവാക്കുകള്‍ക്ക് മുന്നില്‍ യുവാവ് ഒടുവില്‍ കീഴടങ്ങുകയായിരുന്നു. മണിക്കൂറുകള്‍ നീണ്ട ആശങ്കകള്‍ക്ക് വിരാമമിട്ട് വികാരിയുടെ കൈപിടിച്ച് യുവാവ് താഴെയിറങ്ങി. തുടര്‍ന്ന് പൊലിസ് ഇയാളെ കസ്റ്റഡിയിലെടുത്തു. ചേര്‍ത്തല സ്വദേശിയായ ഇയാള്‍ എങ്ങനെയാണ് ഇവിടെയെത്തിയതെന്ന കാര്യം വ്യക്തമല്ല.

A 42-year-old native of Cherthala who climbed atop a church water tank in Chalakudy and threatened suicide was safely brought down after a persuasive intervention by the parish priest, Fr. Johnson Panketh.