കുവൈത്ത് സിറ്റി: കുവൈത്തിലെ പ്രവാസി തൊഴിലാളികളുടെ വിദ്യാഭ്യാസ യോഗ്യതയും അവർ ചെയ്യുന്ന ജോലിയും തമ്മിൽ കൂടുതൽ പൊരുത്തം ഉറപ്പാക്കുന്നതിനായി പബ്ലിക് അതോറിറ്റി ഫോർ മാൻപവർ (PAM) പുതിയ ചട്ടങ്ങൾ പ്രഖ്യാപിച്ചു. തൊഴിൽ വിപണിയെ കൂടുതൽ ക്രമവൽക്കരിക്കുകയും യോഗ്യതയ്ക്ക് അനുയോജ്യമായ തൊഴിൽ ഉറപ്പാക്കുകയും ചെയ്യുക എന്ന ലക്ഷ്യത്തോടെയാണ് നടപടി.

2026-ലെ സർക്കുലർ നമ്പർ (1) പ്രകാരമാണ് പുതിയ മാർഗനിർദേശങ്ങൾ നടപ്പാക്കുന്നത്. തൊഴിലാളിയുടെ വിദ്യാഭ്യാസ യോഗ്യതയോ ജോലി പദവിയോ നിലവിൽ ചെയ്യുന്ന ജോലിയുടെ സ്വഭാവവുമായി പൊരുത്തപ്പെടുന്നതായി തെളിയിക്കാനാകുന്ന സാഹചര്യങ്ങളിൽ, നിശ്ചിത ചട്ടങ്ങൾ പാലിച്ച് അവയിൽ ഭേദഗതി വരുത്താൻ അനുമതി നൽകും.

പുതിയ സർക്കുലർ മൂന്ന് പ്രധാന കാര്യങ്ങൾക്കാണ് പ്രാധാന്യം നൽകുന്നത്. അംഗീകൃത നടപടിക്രമങ്ങൾ അനുസരിച്ച് വിദ്യാഭ്യാസ യോഗ്യതയിലോ തൊഴിൽ പദവിയിലോ ആവശ്യമായ മാറ്റങ്ങൾ അനുവദിക്കുക, തൊഴിലാളികളുടെ അക്കാദമിക് യോഗ്യതയും അവർ നിർവഹിക്കുന്ന ജോലിയും തമ്മിലുള്ള പൊരുത്തം ശക്തിപ്പെടുത്തുക, കൂടാതെ കുവൈത്തിലെ ഏകീകൃത തൊഴിൽ വിവരണവും തൊഴിൽ വർഗീകരണ മാർഗനിർദേശവും കൂടുതൽ വികസിപ്പിക്കുക എന്നിവയാണ് അവ.

ഈ നടപടിയിലൂടെ തൊഴിൽ വിപണിയിൽ കൂടുതൽ സുതാര്യതയും കാര്യക്ഷമതയും കൈവരിക്കാനാകുമെന്നും, തൊഴിലാളികളുടെ കഴിവിനും വിദ്യാഭ്യാസ യോഗ്യതയ്ക്കും അനുയോജ്യമായ തൊഴിൽ അവസരങ്ങൾ ഉറപ്പാക്കാൻ പുതിയ ചട്ടങ്ങൾ സഹായകരമാകുമെന്നും പബ്ലിക് അതോറിറ്റി ഫോർ മാൻപവർ അറിയിച്ചു.

Kuwait’s Public Authority for Manpower (PAM) has introduced new regulations to ensure expatriate workers are employed in positions that match their educational qualifications, enhancing transparency and efficiency in the labor market.