ചെന്നൈ: ഔദ്യോഗിക ചടങ്ങുകള്‍ക്കിടെ പൂര്‍ണ ഗര്‍ഭിണിയായ യുവതിക്കായി വേദിയില്‍ നിന്ന് താഴേക്കിറിങ്ങി വന്ന് നിയമന ഉത്തരവ് കൈമാറി തമിഴ്‌നാട് മുഖ്യമന്ത്രി വിജയ്. ഇതിന്റെ വീഡിയോ സോഷ്യല്‍മീഡിയകളില്‍ വൈറലായിരിക്കുകയാണ്. സംഭവത്തില്‍ വിജയയെ അഭിനന്ദിച്ച് ഒട്ടേറെ പേരാണ് രംഗത്തെത്തിയത്. 

തമിഴ്‌നാട് പബ്ലിക്ക് സര്‍വീസ് കമ്മിഷന്‍ മുഖേന വൈദ്യുതി വകുപ്പില്‍ ജോലി ലഭിച്ച 401 ഉദ്യോഗാര്‍ഥികള്‍ക്കായുള്ള അപ്പോയിന്റ്‌മെന്റ് ലെറ്റര്‍ വിതരണത്തിനിടെയാണ് വിജയ് പ്രോട്ടോക്കോള്‍ ലംഘിച്ച് വേദിയില്‍ നിന്ന് ഇറങ്ങിവന്നത്. ചെന്നൈയിലെ കലൈവനാര്‍ അരംഗം ഓഡിറ്റോറിയത്തിലായിരുന്നു പരിപാടി നടന്നത്. 383 അസിസ്റ്റന്റ് എന്‍ജിനീയര്‍മാരേയും (ഇലക്ട്രിക്കല്‍) 18 അസിസ്റ്റന്റ് അക്കൗണ്ട്‌സ് ഓഫിസര്‍മാരേയുമാണ് പുതുതായി നിയമിച്ചത്. 

ഇക്കൂട്ടത്തില്‍പെട്ടയാളായിരുന്നു അക്ഷയാ ലക്ഷ്മിയും . പൂര്‍ണ ഗര്‍ഭിണിയായിരിക്കെയാണ് അക്ഷയയ്ക്ക് ജോലി ലഭിച്ചത്. ഇവരുടെ പേര് വിളിച്ചപ്പോഴാണ് അവര്‍ ഗര്‍ഭിണിയാണെന്ന കാര്യം വിജയ് ശ്രദ്ധിച്ചത്. പ്രസവത്തിന് ഇനി ഏതാനും ദിവസം മാത്രം ബാക്കി നില്‍ക്കുന്ന അക്ഷയയ്ക്ക് പടി കയറി സ്റ്റേജിലെത്താന്‍ ബുദ്ധിമുട്ടാകുമെന്ന് മനസിലാക്കി വിജയ് വേദിയില്‍ നിന്ന് സദസിലേക്ക് ഇറങ്ങിവരികയായിരുന്നു. 

സദസ്സില്‍ വച്ച് തന്നെ വിജയ് അക്ഷയയ്ക്ക് അപ്പോയ്ന്റ്‌മെന്റ് ലെറ്റര്‍ കൈമാറി. ഇവര്‍ക്ക് എല്ലാ ആശംസകളും നേര്‍ന്ന മുഖ്യമന്ത്രി സുരക്ഷിതമായി കുഞ്ഞിന് ജന്മം നല്‍കാന്‍ കഴിയട്ടെയെന്നും ആശംസിച്ചു. സദസ്സില്‍ നിന്ന് വലിയ കൈയ്യടിയാണ് ഇതേസമയം ഉയര്‍ന്നത്. ഇതാണ് 'യഥാര്‍ഥ ജനനായകന്‍' എന്ന തരത്തിലുള്ള കമന്റുകളോടെ വീഡിയോ സമൂഹമാധ്യമങ്ങളില്‍ വലിയ രീതിയില്‍ പ്രചരിക്കുകയാണ്.

A video showing Chief Minister Vijay allegedly setting aside official protocol to assist a pregnant woman has gone viral on social media. The incident has attracted widespread attention, with many praising the leader’s compassionate and people-centric approach.