കൊച്ചി: അതീവ സുരക്ഷാ മേഖലയായ വില്ലിങ്ഡണ്‍ ഐലന്‍ഡിലെ റെയില്‍ ട്രാക്കിന്റെ അര കിലോമീറ്ററോളം ഭാഗം കാണാനില്ല. മുറിച്ചു കടത്തിയതാണെന്നാണ് സംശയിക്കുന്നത്. വല്ലാര്‍പാടം നിലവില്‍ വന്നതോടെ ഉപയോഗിക്കാതിരുന്ന ട്രാക്കിന്റെ ഭാഗങ്ങളാണ് നഷ്ടപ്പെട്ടത്. വര്‍ഷങ്ങളായി ഉപയോഗിക്കാതിരുന്നതുകൊണ്ടും ഈ ഭാഗത്തേക്കു നിലവില്‍ ചരക്കുനീക്കം ഇല്ലാത്തതിനാലും ട്രാക്ക് കാടുമൂടി കിടക്കുകയായിരുന്നു.

ബുധനാഴ്ച്ചയാണ് സംഭവം അധികൃതരുടെ ശ്രദ്ധയില്‍പെടുന്നത്. ക്യു9 ബര്‍ത്ത് മുതല്‍ ടാറ്റാ ടെറ്റ്‌ലി വരെയുള്ള ഭാഗത്തെ ഉരുക്കു പാളങ്ങളാണ് മോഷണം പോയിരിക്കുന്നത്. 

 ടാറ്റാ ടെറ്റ്‌ലിയുടെ മുന്നിലൂടെ ഹാര്‍ബര്‍ ടെര്‍മിനസ് റെയില്‍വേ സ്റ്റേഷനു മുന്നിലേക്കെത്തുന്ന റോഡിന് കുറുകെ കടന്നു പോയിരുന്നതാണ് ഈ റെയില്‍വേ ലൈന്‍. പുറത്തു നിന്ന് ആര്‍ക്കും അനുവാദമില്ലാതെ കടക്കാന്‍ കഴിയാത്ത മേഖലയാണിത്. സി.ഐ.എസ്.എഫ് സുരക്ഷാ ഉദ്യോഗസ്ഥരുള്‍പ്പെടെ ഇവിടെ കാവലുണ്ട്.ഇവരുടെ കണ്ണു വെട്ടിച്ചാണ് വന്‍തുക വില മതിക്കുന്ന ലോഹഭാഗങ്ങള്‍ പുറത്തേക്കു കടത്തിയത്. 

വെള്ളൂര്‍ എച്ച്.എന്‍.എല്ലിലേക്കു മുമ്പ് കല്‍ക്കരി കൊണ്ടു പോയിരുന്നത് ഈ ട്രാക്ക് വഴിയാണ്. പോര്‍ട്ടിന്റെ ഉടമസ്ഥതയിലുള്ള ഭൂമിയിലെ പാളത്തിന്റെ പരിപാലനചുമതലയും അവര്‍ക്ക് തന്നെയാണ്. 

സംഭവത്തില്‍ തുറമുഖ അതോറിറ്റി അന്വേഷണം ആരംഭിച്ചിട്ടുണ്ട്. അതേസമയം, പൊലിസില്‍ പരാതി നല്‍കിയിട്ടില്ല. 

An investigation has been launched after approximately half a kilometre of railway track was reportedly removed in Kochi. Railway authorities have begun probing the incident to determine how the track was dismantled and whether theft, sabotage, or negligence was involved.