ആലപ്പുഴ: ചരിത്രപ്രസിദ്ധമായ ചമ്പക്കുളം മൂലം വള്ളംകളി ഇന്ന് നടക്കാനിരിക്കെ, കുട്ടനാട് താലൂക്കിന് പ്രാദേശിക അവധി അനുവദിക്കാത്തതില്‍ വ്യാപക പ്രതിഷേധം. വള്ളംകളി പ്രമാണിച്ച് അവധി നല്‍കണമെന്ന് കുട്ടനാട് എംഎല്‍എ റെജി ചെറിയാന്‍ നിയമസഭയില്‍ സബ്മിഷനിലൂടെ ആവശ്യപ്പെട്ടിരുന്നു. എന്നാല്‍, വിഷയം പരിശോധിക്കാമെന്ന് സഭയില്‍ മറുപടി നല്‍കിയ ശേഷം, 'ഒരു കാരണവശാലും കൊടുക്കില്ല' എന്ന് മുഖ്യമന്ത്രി വി.ഡി സതീശന്‍ സഹപ്രവര്‍ത്തകനോട് രഹസ്യമായി പറഞ്ഞതാണ് ഇപ്പോള്‍ വലിയ വിവാദങ്ങള്‍ക്ക് വഴിവച്ചിരിക്കുന്നത്.

താലൂക്കിന് അവധി നല്‍കാത്തതില്‍ ജനപ്രതിനിധി എന്ന നിലയില്‍ തനിക്ക് കടുത്ത വിഷമമുണ്ടെന്ന് എംഎല്‍എ റെജി ചെറിയാന്‍ വ്യക്തമാക്കി. ചെമ്പകശ്ശേരി പള്ളിയില്‍ നിന്ന് ആചാരപ്രകാരം കയറും കൊടിയും സ്വീകരിച്ച് നടത്തുന്ന, നാനൂറിലധികം വര്‍ഷത്തെ പാരമ്പര്യമുള്ള ഈ വള്ളംകളി കുട്ടനാടിന്റെ വലിയൊരു ചരിത്രമാണ്.

 ഇതിന്റെ പാരമ്പര്യം കണക്കിലെടുത്താല്‍ കേരളത്തിന് മൊത്തം അവധി നല്‍കേണ്ടതുണ്ടെന്നും അദ്ദേഹം കൂട്ടിച്ചേര്‍ത്തു. ഈ വര്‍ഷം അനുമതി നിഷേധിച്ചെങ്കിലും വള്ളംകളിയെക്കുറിച്ചുള്ള ചര്‍ച്ചകള്‍ സംസ്ഥാനത്തുടനീളം സജീവമാക്കാന്‍ ഈ വിവാദം കാരണമായിട്ടുണ്ട്. അതിനാല്‍ അടുത്ത വര്‍ഷം കുട്ടനാട്ടുകാര്‍ക്കായി പ്രാദേശിക അവധി കൂടുതല്‍ ശക്തമായി ആവശ്യപ്പെടുമെന്നും അദ്ദേഹം പ്രത്യാശ പ്രകടിപ്പിച്ചു.

ഒരു നല്ല കാര്യത്തിനായി ശ്രമിച്ചപ്പോള്‍ ഉണ്ടായ അനാവശ്യ തര്‍ക്കങ്ങളില്‍ തനിക്ക് വ്യക്തിപരമായി സങ്കടമുണ്ടെന്നും എംഎല്‍എ പറഞ്ഞു. നിയമസഭയില്‍ സബ്മിഷന് മറുപടി നല്‍കി സീറ്റിലിരിക്കുന്നതിനിടെ, മുഖ്യമന്ത്രി അടുത്തിരുന്ന മന്ത്രി പി.കെ കുഞ്ഞാലിക്കുട്ടിയോട് 'ഒരു കാരണവശാലും കൊടുക്കില്ല' എന്ന് പറയുന്ന ദൃശ്യങ്ങള്‍ സാമൂഹിക മാധ്യമങ്ങളില്‍ പ്രചരിച്ചതോടെയാണ് സംഭവം രാഷ്ട്രീയ വിവാദമായി മാറിയത്.

Despite demands from Kuttanad MLA Reji Cheriyan, no local holiday was declared for the historic Champakulam Moolam Boat Race today, triggering a controversy over Chief Minister VD Satheesan's leaked off-mike refusal in the assembly.