തിരുവമ്പാടി: പതങ്കയത്ത് ടൂറിസ്റ്റുകളുമായി എത്തിയപ്പോള്‍ അപകടത്തില്‍പ്പെട്ട രണ്ടുപേരെ രക്ഷിക്കുന്നതിനിടയില്‍ ഒഴുക്കില്‍ പെട്ട് കാണാതായ ടൂറിസ്റ്റ് ഗൈഡിന്റെ മൃതദേഹം കണ്ടെത്തി. മലപ്പുറം കുഴിമണ്ണ സ്വദേശിയായ ഷിബില്‍ റഹ്മാന്റെ(25) മൃതദേഹമാണ് മൂന്ന് ദിവസത്തിന് ശേഷം കണ്ടെത്തിയത്. 

മുക്കം അഗ്‌നിരക്ഷാസേന ഓഫിസര്‍ എന്‍. അഹമ്മദ് റഹീഷിന്റെ നേതൃത്വത്തിലുള്ള സംഘമാണ് ഇന്നലെ രാവിലെ ഏഴിന് തുടങ്ങിയ തിരച്ചിലിന് നേതൃത്വം നല്‍കിയത്. കോഴിക്കോട് നിന്നുള്ള അഗ്‌നിരക്ഷാസേനയുടെ സ്‌കൂബ ടീമും തിരച്ചിലിനുണ്ടായിരുന്നു. ഡ്രോണുകളു പയോഗിച്ചും ഊര്‍ജ്ജിതമായ പരിശോധന നടത്തിയിരുന്നെങ്കിലും ഉച്ചയോടെ ശക്തമായ മലവെള്ളപ്പാച്ചില്‍ ഉണ്ടായതിനെത്തുടര്‍ന്ന് പുഴയിലിറങ്ങിയുള്ള തിരച്ചില്‍ നിര്‍ത്തിവയ്‌ക്കേണ്ടി വന്നു. തുടര്‍ന്ന് കരയോട് ചേര്‍ന്നുള്ള ഭാഗങ്ങളില്‍ പരിശോധന നടത്തിയ ശേഷം ഇന്നലത്തെ തിരച്ചില്‍ അവസാനിപ്പിച്ചിരുന്നു.  ഇന്ന് രാവിലെ ആറ് മണിയോടെയാണ് തിരച്ചില്‍ പുനരാരംഭിച്ചത്. 

ശനിയാഴ്ച്ച വൈകീട്ടോടെയാണ് അപകടമുണ്ടായത്. ആനക്കാംപൊയില്‍ പതങ്കയം വെള്ളച്ചാട്ടത്തിന് മുകളില്‍ കാലമ്പാറ തൂക്കുപാലത്തിന് താഴെവച്ചാണ് അപകടമുണ്ടായത്. 

ഷിബിലിനൊപ്പം ബംഗളുരുവില്‍ നിന്നെത്തിയ 11 അംഗ വിനോദസഞ്ചാരികളാണ് ഉണ്ടായിരുന്നത്. ഇവര്‍ പാറക്കെട്ടുകള്‍ക്ക് മുകളില്‍ കയറി പ്രകൃതിസൗന്ദര്യം ആസ്വദിക്കുന്നതിനിടെ പെട്ടന്ന് മലവെള്ളപ്പാച്ചിലുണ്ടായി. രണ്ട് പേര്‍ പാറയില്‍ കാല്‍വഴുതി ഒഴുക്കില്‍പെട്ടു. ഇവരെ രക്ഷിക്കാനുള്ള ശ്രമത്തിനിടെയാണ് ഷിബില്‍ ഒഴുക്കില്‍പെട്ടത്. വിനോദസഞ്ചാരികളായ രണ്ട് പേരെയും നാട്ടുകാര്‍ രക്ഷപ്പെടുത്തിയെങ്കിലും ഷിബിലിനെ കാണാതാവുകയായിരുന്നു.