ന്യൂഡല്‍ഹി: രാജസ്ഥാനിലെ ദൗസയ്ക്ക് സമീപം ഡല്‍ഹി-മുംബൈ എക്‌സ്പ്രസ്‌വേയിലുണ്ടായ ദാരുണമായ അപകടത്തില്‍ ഏഴ് പേര്‍ വെന്തുമരിച്ചു. സ്ലീപ്പര്‍ ബസ് വലിയ ട്രെയിലര്‍ ട്രക്കുമായി കൂട്ടിയിടിച്ച് തീപിടിച്ചാണ് അപകടമുണ്ടായത്. ദുരന്തത്തില്‍ സ്ത്രീകളും കുട്ടികളുമടങ്ങുന്ന 22 യാത്രക്കാര്‍ക്ക് പരിക്കേറ്റു. ഇവരെ ഉടന്‍ തന്നെ ദൗസ ജില്ലാ ആശുപത്രിയില്‍ പ്രവേശിപ്പിച്ചു.

പുലര്‍ച്ചെ 2-30 ഓടെയായിരുന്നു അപകടം. ഋഷികേശില്‍ നിന്നും മധ്യപ്രദേശിലെ ഇന്‍ഡോറിലേക്ക് അമിതവേഗതയില്‍ പോവുകയായിരുന്ന ബസാണ് അപകടത്തില്‍പ്പെട്ടത്. ഇടിയുടെ ആഘാതത്തില്‍ ഇരു വാഹനങ്ങള്‍ക്കും ഉടനടി തീപിടിക്കുകയായിരുന്നു. അപകടസമയത്ത് ഭൂരിഭാഗം യാത്രക്കാരും ഉറക്കത്തിലായിരുന്നുവെന്നും ഇടിയുടെ ശക്തിയില്‍ മുകളിലെ ബര്‍ത്തുകളിലുണ്ടായിരുന്നവര്‍ താഴേക്ക് തെറിച്ചുവീണതായും ദൃക്‌സാക്ഷികള്‍ പറഞ്ഞു. ബസ് ഡ്രൈവര്‍ ഉറങ്ങിപ്പോയതോ അമിതവേഗതയോ ആവാം അപകടത്തിന് കാരണമെന്നാണ് പൊലിസിന്റെ പ്രാഥമിക നിഗമനം.

അതേസമയം, രക്ഷാപ്രവര്‍ത്തകരും ഫയര്‍ഫോഴ്‌സും സംഭവസ്ഥലത്ത് എത്താന്‍ വൈകിയതാണ് മരണസംഖ്യ ഉയരാന്‍ കാരണമായതെന്ന് നാട്ടുകാര്‍ ആരോപിച്ചു. തീപിടിച്ച് ഒരു മണിക്കൂറിന് ശേഷമാണ് ബസിനുള്ളില്‍ കുടുങ്ങിയവരെ പുറത്തെടുക്കാനായതെന്നും ബസിന്റെ സ്റ്റോറേജ് ബോക്‌സില്‍ സൂക്ഷിച്ചിരുന്ന സിഗരറ്റ് പാക്കറ്റുകളാണ് തീ അതിവേഗം പടരാന്‍ ഇടയാക്കിയതെന്നും പ്രദേശവാസികള്‍ അവകാശപ്പെടുന്നുണ്ട്. സംഭവത്തെക്കുറിച്ച് പൊലിസ് അന്വേഷണം ആരംഭിച്ചിട്ടുണ്ട്.