ദുബൈ: യുഎഇയിൽ അതിശക്തമായ വേനൽച്ചൂട് തുടരുന്നു. ഇന്ന് രാജ്യത്തിന്റെ ഉൾപ്രദേശങ്ങളിൽ താപനില 47 ഡിഗ്രി സെൽഷ്യസ് വരെ ഉയരുമെന്ന് ദേശീയ കാലാവസ്ഥാ കേന്ദ്രം (NCM) അറിയിച്ചു. പൊതുവെ തെളിഞ്ഞ കാലാവസ്ഥയായിരിക്കുമെങ്കിലും കിഴക്കൻ മേഖലകളിൽ ഭാഗികമായി മേഘാവൃതമായ അന്തരീക്ഷം അനുഭവപ്പെടും.

കിഴക്കൻ തീരപ്രദേശങ്ങളിൽ താഴ്ന്ന മേഘങ്ങൾ രൂപപ്പെടാനും ഉച്ചയ്ക്കുശേഷം ചില പ്രദേശങ്ങളിൽ ഇടിമേഘങ്ങൾക്ക് അനുകൂല സാഹചര്യം ഉണ്ടാകാനും സാധ്യതയുണ്ട്. തീരപ്രദേശങ്ങളിൽ രാത്രി മുതൽ നാളെ രാവിലെ വരെ ഈർപ്പം വർധിക്കുമെന്നും മുന്നറിയിപ്പുണ്ട്.

വടക്കുകിഴക്കൻ, വടക്കുപടിഞ്ഞാറൻ ദിശകളിൽ നിന്ന് മണിക്കൂറിൽ 30 കിലോമീറ്റർ വരെ വേഗത്തിൽ നേരിയതോ മിതമായതോ ആയ കാറ്റ് വീശും. അറബിക്കടലിലും ഒമാൻ കടലിലും പൊതുവെ ശാന്തമായ കടൽസ്ഥിതിയായിരിക്കും.

ഉൾപ്രദേശങ്ങളിൽ 41 മുതൽ 47 ഡിഗ്രി സെൽഷ്യസ് വരെയും തീരദേശങ്ങളിലും ദ്വീപുകളിലും 37 മുതൽ 42 ഡിഗ്രി സെൽഷ്യസ് വരെയും പർവതപ്രദേശങ്ങളിൽ 31 മുതൽ 37 ഡിഗ്രി സെൽഷ്യസ് വരെയും താപനില രേഖപ്പെടുത്തുമെന്നാണ് പ്രവചനം.

നാളെയും സമാനമായ കാലാവസ്ഥ തുടരുമെങ്കിലും ഞായറാഴ്ച മുതൽ ചൊവ്വാഴ്ച വരെ കാറ്റിന്റെ വേഗം മണിക്കൂറിൽ 40 കിലോമീറ്റർ വരെ ഉയരാൻ സാധ്യതയുണ്ട്. ഇതോടെ പ്രത്യേകിച്ച് പടിഞ്ഞാറൻ മേഖലകളിൽ പൊടിക്കാറ്റിന് സാധ്യത വർധിക്കും. ചൊവ്വാഴ്ച രാത്രിയും ബുധനാഴ്ച പുലർച്ചെയും തീരദേശങ്ങളിലും ചില ഉൾപ്രദേശങ്ങളിലും ഈർപ്പം കൂടുന്നതിനെ തുടർന്ന് മൂടൽമഞ്ഞ് അല്ലെങ്കിൽ നേരിയ മഞ്ഞ് രൂപപ്പെടാനും സാധ്യതയുണ്ടെന്ന് കാലാവസ്ഥാ കേന്ദ്രം അറിയിച്ചു.