ഷാർജ: ഷാർജയിലെയും വടക്കൻ ഇമാറാത്തുകളിലെയും ഇന്ത്യൻ സമൂഹത്തിന് ആശ്വാസമായി ഇന്ത്യൻ അസോസിയേഷൻ ഷാർജയും ദുബൈയിലെ ഇന്ത്യൻ കോൺസുലേറ്റ് ജനറലും ചേർന്ന് പ്രത്യേക രണ്ട് ദിവസത്തെ കോൺസുലർ അറ്റസ്റ്റേഷൻ സേവനം സംഘടിപ്പിക്കുന്നു. ജൂലൈ 4, 5 തീയതികളിൽ ഇന്ത്യൻ അസോസിയേഷൻ ഷാർജ (ഐഎഎസ്) ആസ്ഥാനത്താണ് സേവനം ലഭ്യമാകുക. രാവിലെ 9 മുതൽ വൈകിട്ട് 4.30 വരെയാണ് സേവന സമയം.

വിദേശകാര്യ ആവശ്യങ്ങൾക്കായി രേഖകൾ അറ്റസ്റ്റേഷൻ ചെയ്യേണ്ട ഇന്ത്യൻ പൗരന്മാർക്ക് ദുബൈയിലേക്ക് യാത്ര ചെയ്യാതെ ഷാർജയിൽ തന്നെ സേവനം ലഭ്യമാക്കുകയെന്ന ലക്ഷ്യത്തോടെയാണ് പ്രത്യേക ക്യാംപ് സംഘടിപ്പിക്കുന്നത്. അറ്റസ്റ്റേഷൻ ആവശ്യമായ അസൽ രേഖകൾ, ആവശ്യമായ പകർപ്പുകൾ, പാസ്പോർട്ട്, എമിറേറ്റ്സ് ഐഡി, നിശ്ചിത ഫീസ്, കോൺസുലേറ്റിന്റെ മാർഗനിർദേശപ്രകാരം ആവശ്യമായ മറ്റ് രേഖകൾ എന്നിവ കൈവശം കരുതണമെന്ന് അധികൃതർ അറിയിച്ചു.

രേഖകൾ പൂർണമായും തയ്യാറാക്കി എത്തുന്നവർക്ക് നടപടിക്രമങ്ങൾ വേഗത്തിലും സുഗമമായും പൂർത്തിയാക്കാൻ സാധിക്കുമെന്ന് അധികൃതർ വ്യക്തമാക്കി.

ഇന്ത്യൻ സമൂഹത്തിന്റെ സൗകര്യാർഥം പ്രത്യേക സേവന പരിപാടി സംഘടിപ്പിച്ച ദുബൈയിലെ ഇന്ത്യൻ കോൺസുലേറ്റ് ജനറലിന് ഇന്ത്യൻ അസോസിയേഷൻ ഷാർജ പ്രസിഡന്റ് നിസാർ തളങ്കര നന്ദി രേഖപ്പെടുത്തി. പരമാവധി പേർ ഈ അവസരം പ്രയോജനപ്പെടുത്തണമെന്നും അദ്ദേഹം അഭ്യർത്ഥിച്ചു.

Indian Association Sharjah begins a special consular attestation service from tomorrow, offering convenient document verification and attestation support for the Indian community across the UAE with streamlined processing.