ദുബൈ: യുഎഇയിൽ കനത്ത വേനൽ ചൂടിനെത്തുടർന്ന് നടപ്പിലാക്കിയ ഉച്ചഭക്ഷണ നിരോധന സമയത്ത് (Midday Break) ജോലി ചെയ്യണോ വേണ്ടയോ എന്ന് സ്വയം തീരുമാനിക്കാൻ ഡെലിവറി റൈഡർമാർക്ക് അനുമതി. നിയന്ത്രിത സമയങ്ങളിൽ ഡെലിവറി റൈഡർമാരെ നിർബന്ധിച്ച് ജോലി ചെയ്യിക്കാൻ കമ്പനികൾക്ക് അവകാശമില്ലെന്ന് യുഎഇ മാനവ വിഭവശേഷി, സ്വദേശിവൽക്കരണ മന്ത്രാലയം (MoHRE) വീണ്ടും വ്യക്തമാക്കി. അതേസമയം, റൈഡർമാരുടെ സുരക്ഷ മുൻനിർത്തി രാജ്യത്തുടനീളം 12,000-ത്തിലധികം എയർ കണ്ടീഷൻ ചെയ്ത വിശ്രമ കേന്ദ്രങ്ങളും സജ്ജമാക്കിയിട്ടുണ്ട്.

മന്ത്രാലയത്തിന്റെ നിർദേശങ്ങൾ ഉൾപ്പെടുത്തി പ്രാദേശിക പത്രമായ അൽ ബയാൻ ആണ് ഈ വാർത്ത റിപ്പോർട്ട് ചെയ്തത്. തൊഴിലുടമയുമായി മുൻകൂട്ടി സംസാരിച്ച് ധാരണയിലെത്തിയ ശേഷം റൈഡർമാർക്ക് ഉച്ചയ്ക്ക് 12:30 മുതൽ 3:00 വരെയുള്ള സമയങ്ങളിൽ ജോലിയിൽ നിന്ന് മാറിനിൽക്കാനോ അല്ലെങ്കിൽ തുടരാനോ തീരുമാനിക്കാം.

നിയമം ലംഘിച്ചാൽ കർശന നടപടി

വേനൽക്കാലത്തെ കടുത്ത ചൂടിൽ നിന്ന് തൊഴിലാളികളെ സംരക്ഷിക്കുന്നതിനുള്ള ചട്ടങ്ങൾ എല്ലാ കമ്പനികളും നിർബന്ധമായും പാലിക്കണമെന്ന് മന്ത്രാലയം ഓർമ്മിപ്പിച്ചു. വിലക്കുള്ള സമയങ്ങളിൽ തൊഴിലാളികളെ നിർബന്ധിച്ച് പണിയെടുപ്പിക്കുന്നത് നിയമവിരുദ്ധമാണ്. ജൂൺ 15 മുതൽ സെപ്റ്റംബർ 15 വരെയുള്ള മൂന്ന് മാസക്കാലമാണ് യുഎഇയിൽ ഉച്ചസമയത്തെ തൊഴിൽ നിരോധനം ഏർപ്പെടുത്തിയിരിക്കുന്നത്.

ആശ്വാസമായി 12,000 കൂളിംഗ് സ്റ്റേഷനുകൾ

സ്ഥിരമായി ഒരേ സ്ഥലത്തിരുന്ന് ജോലി ചെയ്യുന്നവർക്ക് പുറമെ, നിരന്തരം യാത്ര ചെയ്യുന്ന ഡെലിവറി റൈഡർമാരുടെ ബുദ്ധിമുട്ടുകൾ കണക്കിലെടുത്താണ് വിപുലമായ സൗകര്യങ്ങൾ ഒരുക്കിയിട്ടുള്ളത്. സർക്കാർ-സ്വകാര്യ മേഖലകളുടെ പങ്കാളിത്തത്തോടെയാണ് എയർ കണ്ടീഷൻ ചെയ്ത 12,000-ത്തിലധികം വിശ്രമ കേന്ദ്രങ്ങൾ സ്ഥാപിച്ചിരിക്കുന്നത്.

റൈഡർമാർക്ക് അവരുടെ ഡെലിവറി ആപ്ലിക്കേഷനുകളിലുള്ള (Delivery Apps) ഇന്ററാക്ടീവ് മാപ്പുകൾ വഴി തങ്ങൾക്ക് തൊട്ടടുത്തുള്ള കൂളിംഗ് സ്റ്റേഷനുകൾ എളുപ്പത്തിൽ കണ്ടെത്താനാകും.

ദുബൈ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA), അബുദബി മൊബിലിറ്റി, വിവിധ എമിറേറ്റുകളിലെ സാമ്പത്തിക വകുപ്പുകൾ, ഇമറാത്ത് പെട്രോളിയം എന്നിവയ്ക്ക് പുറമെ തലാബത്ത്, ഡെലിവറൂ, നൂൺ, കരീം തുടങ്ങിയ മുൻനിര ഡെലിവറി ആപ്പുകളും മാളുകളും റെസ്റ്റോറന്റുകളും ഈ സംരംഭത്തിൽ പങ്കാളികളാണ്.

തുടർച്ചയായ നാലാം വർഷമാണ് യുഎഇ ഈ വിശ്രമകേന്ദ്ര പദ്ധതി വിജയകരമായി നടപ്പിലാക്കുന്നത്. തുറസ്സായ സ്ഥലങ്ങളിൽ ജോലി ചെയ്യുന്നവരുടെ ആരോഗ്യ സുരക്ഷ ഉറപ്പാക്കുന്നതിൽ യുഎഇ സർക്കാർ പുലർത്തുന്ന ജാഗ്രതയുടെ ഭാഗമായാണ് നടപടി.

ALSO READ: നൈറ്റ് ലൈഫിന് ദുബൈ തന്നെ സുരക്ഷിതം; നഗരത്തിൽ രാത്രി ഒറ്റയ്ക്ക് നടക്കാൻ ഭയമില്ലെന്ന് 98.7 ശതമാനം പേരും

The UAE allows delivery riders to decide whether to work during midday hours while providing 12,000 shaded rest stations, enhancing worker safety, flexibility, and protection during extreme summer temperatures.