ന്യൂഡല്‍ഹി: അയോധ്യ രാമക്ഷേത്രത്തിലെ സംഭാവനക്കൊള്ളയില്‍ മൗനം വെടിഞ്ഞ് ആര്‍എസ്എസ്. സംഭവം അങ്ങേയറ്റം വേദനാജനകമാണെന്നും, ഇത് കോടിക്കണക്കിന് രാമഭക്തരുടെയും, ഹിന്ദു സമൂഹത്തിന്റെയും വിശ്വാസത്തെ മുറിപ്പെടുത്തിയതായും ആര്‍എസ്എസ് ജനറല്‍ സെക്രട്ടറി ദത്താത്രേയ ഹൊസബാലെ പറഞ്ഞു. പ്രയാസകരമായ ഘട്ടത്തില്‍ ഹൈന്ദവ സമൂഹം സംയമനം പാലിക്കണമെന്നും ഹൊസബാലെ ആവശ്യപ്പെട്ടു. 

ക്ഷേത്രത്തിന്റെ നടത്തിപ്പിലും സുരക്ഷാ സംവിധാനങ്ങളിലും സംഭവിച്ച പാളിച്ചകള്‍ അതീവ ഗൗരവത്തോടെ കാണണം. ഈ സംഭവത്തെ ഒരു അസാധാരണ വിഷയമായി കണ്ട് മാനേജ്‌മെന്റിലുള്ള എല്ലാ പോരായ്മകളും അടിയന്തരമായി പരിഹരിക്കാന്‍ ട്രസ്റ്റ് മുന്‍കൈയെടുക്കണം. രാമഭക്തരുടെ വിശ്വാസം അചഞ്ചലമായി നിലനിര്‍ത്താന്‍ ഇത്തരം നടപടികള്‍ അത്യന്താപേക്ഷിതമാണെന്നും, നിലനില്‍ക്കുന്ന ആശയക്കുഴപ്പങ്ങളും അനിശ്ചിത്വങ്ങളും അവസാനിപ്പിക്കണം,' പ്രസ്താവനയില്‍ പറയുന്നു. 

അതേസമയം ശ്രീരാമ ജന്മഭൂമി തീര്‍ഥക്ഷേത്ര ട്രസ്റ്റിന്റെ അഭ്യര്‍ഥന മാനിച്ച് ഉത്തര്‍പ്രദേശ് സര്‍ക്കാര്‍ പ്രത്യേക അന്വേഷണ സംഘത്തെ നിയമിച്ചകാര്യം ആര്‍എസ്എസ് ചൂണ്ടിക്കാട്ടി. അന്വേഷണത്തില്‍ കുറ്റക്കാരെന്ന് കണ്ടെത്തുന്നവര്‍ക്കെതിരെ നിയമത്തിന്റെ ഏറ്റവും കര്‍ശനമായ വകുപ്പുകള്‍ ചുമത്തി ശിക്ഷഷ ഉറപ്പാക്കണമെന്നും സംഘടന ആവശ്യപ്പെട്ടു. 

ഈ നിര്‍ഭാഗ്യകരമായ സംഭവത്തെ മുന്‍നിര്‍ത്തി 'ഹിന്ദു വിരുദ്ധ' 'ദേശ വിരുദ്ധ' ശക്തികള്‍ ഹൈന്ദവ ധര്‍മത്തെയും, ക്ഷേത്രത്തെയും അവഹേളിക്കാന്‍ ശ്രമിക്കുകയാണെന്നും ഹൊസബാലെ കുറ്റപ്പെടുത്തി. ഇത്തരം ഗൂഢാലോചനകളെ തിരിച്ചറിയണമെന്നും പ്രസ്താവനയില്‍ പറയുന്നു. ക്ഷേത്ര അന്തരീക്ഷത്തില്‍ പരിശുദ്ധിയും ഭക്തിയും നിലനിര്‍ത്തിക്കൊണ്ടുപോകാന്‍ ട്രസ്റ്റിന് കഴിയുമെന്നും, വിശ്വാസികളുടെ ആത്മവിശ്വാസം വീണ്ടെടുക്കാന്‍ അത് സഹായിക്കുമെന്നും ഹൊസബാലെ കൂട്ടിച്ചേര്‍ത്തു.