ന്യൂഡല്‍ഹി: അന്താരാഷ്ട്ര വിപണിയില്‍ ക്രൂഡ് ഓയില്‍ വില കുത്തനെ ഇടിഞ്ഞതോടെ രാജ്യത്ത് പെട്രോള്‍, ഡീസല്‍ വില ഉടന്‍ കുറഞ്ഞേക്കുമെന്ന് സൂചന. ആഗോളതലത്തിലെ ഈ വിലക്കുറവ് ആഭ്യന്തര പൊതുമേഖലാ എണ്ണക്കമ്പനികള്‍ക്ക് വലിയ ആശ്വാസമാണ് പകരുന്നത്. വരും ദിവസങ്ങളിലും അസംസ്‌കൃത എണ്ണവില ഇതേ നിരക്കില്‍ തുടരുകയാണെങ്കില്‍, അടുത്ത ഒന്നുരണ്ടാഴ്ചയ്ക്കുള്ളില്‍ ഇന്ധന വില്‍പനയിലൂടെയുള്ള നഷ്ടം പൂര്‍ണ്ണമായും മറികടക്കാന്‍ കമ്പനികള്‍ക്ക് സാധിക്കും.

പശ്ചിമേഷ്യന്‍ പ്രതിസന്ധിയെത്തുടര്‍ന്ന് മാസങ്ങളോളം വലിയ സാമ്പത്തിക നഷ്ടം നേരിട്ട ശേഷമാണ് എണ്ണക്കമ്പനികള്‍ക്ക് ഇപ്പോള്‍ അനുകൂല സാഹചര്യമൊരുങ്ങുന്നത്. എന്നാല്‍, ഗാര്‍ഹിക എല്‍പിജി സിലിണ്ടറുകളുടെ വില്‍പനയില്‍ കമ്പനികള്‍ ഇപ്പോഴും 500 രൂപയോളം നഷ്ടം സഹിക്കുന്നുണ്ട്. നിലവില്‍ കഴിഞ്ഞ നാല് മാസത്തെ ഏറ്റവും താഴ്ന്ന നിരക്കിലാണ് ക്രൂഡ് ഓയില്‍ വ്യാപാരം നടക്കുന്നത്. ആഗോള വിപണിയില്‍ ബ്രെന്റ് ക്രൂഡ് വില ബാരലിന് 72 ഡോളറിലേക്കും ഇന്ത്യന്‍ ക്രൂഡ് ബാസ്‌കറ്റ് വില ബാരലിന് 6768 ഡോളറിലേക്കും താഴ്ന്നിട്ടുണ്ട്. ഇത് യുദ്ധത്തിന് മുന്‍പുള്ള നിരക്കുകള്‍ക്ക് സമാനമാണ്.

കഴിഞ്ഞ മെയ് 15ന് ശേഷം രാജ്യത്ത് ഇന്ധനവിലയില്‍ ലിറ്ററിന് 7.5 രൂപയോളം വര്‍ധനയുണ്ടായിരുന്നു. ഇതേത്തുടര്‍ന്ന് ഐഒസി, ബിപിസിഎല്‍, എച്ച്പിസിഎല്‍ തുടങ്ങിയ പൊതുമേഖലാ കമ്പനികള്‍ക്ക് പെട്രോള്‍, ഡീസല്‍, എല്‍പിജി വില്‍പനയിലൂടെ 74,781 കോടി രൂപയുടെ ഭീമമായ നഷ്ടമാണ് ഉണ്ടായത്. എണ്ണവില ബാരലിന് 75 ഡോളറിന് താഴെ തുടരുകയാണെങ്കില്‍ അടുത്ത 6 മുതല്‍ 12 മാസങ്ങള്‍ക്കുള്ളില്‍ ഈ നഷ്ടം നികത്താന്‍ കമ്പനികള്‍ക്ക് കഴിഞ്ഞേക്കും.

സൗദി അറേബ്യയുടെയും റഷ്യയുടെയും നേതൃത്വത്തിലുള്ള ഒപെക് പ്ലസ് (OPEC+) സഖ്യം ഓഗസ്റ്റ് മുതല്‍ പ്രതിദിനം 1,88,000 ബാരല്‍ എണ്ണ അധികമായി ഉത്പാദിപ്പിക്കാന്‍ തീരുമാനിച്ചിട്ടുണ്ട്. ഇതോടെ ആഗോള വിപണിയില്‍ എണ്ണ വിതരണം വര്‍ധിക്കുകയും വില വീണ്ടും താഴാന്‍ കാരണമാവുകയും ചെയ്യും. ആവശ്യമായ എണ്ണയുടെ 90 ശതമാനവും ഇറക്കുമതി ചെയ്യുന്ന ഇന്ത്യയെപ്പോലുള്ള രാജ്യങ്ങള്‍ക്ക് ഇത് വലിയ ആശ്വാസമാണ്. ഇത് രാജ്യത്തെ പണപ്പെരുപ്പം നിയന്ത്രിക്കാനും തന്ത്രപ്രധാനമായ പെട്രോളിയം കരുതല്‍ ശേഖരം വര്‍ധിപ്പിക്കാനും സഹായിക്കും.

വരാനിരിക്കുന്ന പാര്‍ലമെന്റ് സമ്മേളനവും ഇന്ധനവില കുറയ്ക്കാന്‍ സര്‍ക്കാരിനെ പ്രേരിപ്പിക്കുന്ന പ്രധാന ഘടകമാണ്. എണ്ണവില വര്‍ധനവിനെതിരെ പ്രതിപക്ഷം പാര്‍ലമെന്റില്‍ ശക്തമായ പ്രതിഷേധം ഉയര്‍ത്താന്‍ സാധ്യതയുള്ളതിനാല്‍, ഈ സാഹചര്യം ഒഴിവാക്കാനായി സമ്മേളനത്തിന് മുന്നോടിയായിത്തന്നെ വില കുറച്ചേക്കുമെന്നാണ് വിലയിരുത്തല്‍.

Due to a sharp decline in international crude oil prices and the upcoming parliament session, oil marketing companies in India are highly likely to slash petrol and diesel prices within the next few days.