ദോഹ: സൗരോര്‍ജവും അത്യാധുനിക സ്മാര്‍ട്ട് സാങ്കേതികവിദ്യകളും ഉപയോഗിച്ച് പ്രവര്‍ത്തിക്കുന്ന ഖത്തറിലെ ആദ്യ 'സ്മാര്‍ട്ട് മസ്ജിദ്' (Smrat Masjid) ഉദ്ഘാടനം ചെയ്തു. ഊര്‍ജ ഉപയോഗം കാര്യക്ഷമമാക്കുന്നതിനും ജലസംരക്ഷണം ഉറപ്പാക്കുന്നതിനും രാജ്യത്തിന്റെ സുസ്ഥിര വികസന ലക്ഷ്യങ്ങളെ പിന്തുണയ്ക്കുന്നതിനുമാണ് പുതിയ പദ്ധതി.
ഖത്തറിലെ മിനിസ്ട്രി ഓഫ് എന്‍ഡോവ്‌മെന്റ് ആന്‍ഡ് ഇസ്ലാമിക്കാര്യ മന്ത്രലായം ആണ് ഖൈസ് ബിന്‍ സഅ്ദ് ബിന്‍ ഉബൈദ മസ്ജിദ് തിങ്കളാഴ്ച ഉദ്ഘാടനം ചെയ്തത്. മുവൈഥര്‍ എന്ന പ്രദേശത്താണ് മസ്ജിദ് സ്ഥിതിചെയ്യുന്നത്.

മസ്ജിദില്‍ വൈദ്യുതിയും ജലവും കാര്യക്ഷമമായി ഉപയോഗിക്കുന്ന സ്മാര്‍ട്ട് സംവിധാനങ്ങളുമാണ് ഒരുക്കിയിരിക്കുന്നത്. സൗരോര്‍ജ പാനലുകള്‍ വഴി ലൈറ്റിംഗിനും എയര്‍ കണ്ടീഷനിംഗിനും ആവശ്യമായ വൈദ്യുതി ഉല്‍പാദിപ്പിക്കും.
അംഗ സ്‌നാനം ചെയ്യാനായി (വുദൂ) ഉപയോഗിച്ച വെള്ളം പ്രത്യേക ശുദ്ധീകരണ സംവിധാനത്തിലൂടെ സംസ്‌കരിച്ച് ശൗചാലയങ്ങളിലും മസ്ജിദ് പരിസരത്തെ ഹരിതവല്‍ക്കരണത്തിനുമായി വീണ്ടും ഉപയോഗിക്കും.
ഇതിലൂടെ കാര്‍ബണ്‍ പുറന്തള്ളല്‍ കുറയ്ക്കാനും പരമ്പരാഗത ഊര്‍ജ സ്രോതസുകളെ ആശ്രയിക്കുന്നത് കുറയ്ക്കാനും കഴിയുമെന്ന് അധികൃതര്‍ അറിയിച്ചു.

#وزارة_الأوقاف تُدشّن أول مسجد ذكي في قطر بمنطقة معيذر، ضمن منظومة المساجد الذكية لتعزيز الاستدامة وجودة الخدمات الدينية pic.twitter.com/VMk2ulG9Qa

— وزارة الأوقاف والشؤون الإسلامية (@AwqafM) July 6, 2026

കൂടുതല്‍ സ്മാര്‍ട്ട് മസ്ജിദുകള്‍ വരും

സര്‍ക്കാര്‍, സ്വകാര്യ പങ്കാളിത്തത്തിലൂടെ സ്മാര്‍ട്ട് സാങ്കേതികവിദ്യകള്‍ ആരാധനാലയങ്ങളില്‍ വിജയകരമായി ഉള്‍പ്പെടുത്താന്‍ ഈ പദ്ധതി സഹായിച്ചുവെന്ന് ഔഖാഫ് മന്ത്രാലയത്തിലെ ദഅ്‌വയും മസ്ജിദ് കാര്യങ്ങളും കൈകാര്യം ചെയ്യുന്ന അസിസ്റ്റന്റ് അണ്ടര്‍ സെക്രട്ടറി  പറഞ്ഞു. വിഷന്‍ 2030 തന്ത്രപരമായ പദ്ധതിയുടെ ഭാഗമായി ഖത്തറിന്റെ വിവിധ ഭാഗങ്ങളില്‍ സമാന മാതൃകയിലുള്ള കൂടുതല്‍ സ്മാര്‍ട്ട് മസ്ജിദുകള്‍ നിര്‍മിക്കുമെന്നും അദ്ദേഹം അറിയിച്ചു.

പരമ്പരാഗത ഇസ്‌ലാമിക വാസ്തുവിദ്യയും ആധുനിക എന്‍ജിനീയറിങ് സാങ്കേതികവിദ്യയും സംയോജിപ്പിച്ചാണ് മസ്ജിദ് രൂപകല്‍പ്പന ചെയ്തിരിക്കുന്നത്. ഇതിലൂടെ വിശ്വാസികള്‍ക്ക് കൂടുതല്‍ സൗകര്യപ്രദവും പരിസ്ഥിതി സൗഹൃദവുമായ ആരാധനാന്തരീക്ഷം ഒരുക്കുകയാണ് ലക്ഷ്യം.

English Summary: Qatar has inaugurated its first smart mosque powered by solar energy, introducing advanced technologies to improve energy efficiency, conserve water and support the country’s sustainability goals. Ministry of Endowments (Awqaf) and Islamic Affairs officially opened the Qais bin Saad bin Ubadah Mosque in the Muaither area, making it the first facility of its kind in the country. The project is part of a broader programme to expand mosque infrastructure in newly developed residential areas as Qatar’s urban population continues to grow.