ദുബൈ: ഇത്തിഹാദ് എനര്‍ജി ഹോള്‍ഡിംഗ് ഫുജൈറ സര്‍ക്കാരുമായി 10 വര്‍ഷത്തെ ഇന്ധന വിതരണ (ഓഫ്‌ടേക്ക്) കരാര്‍ ഒപ്പുവെച്ചു. കമ്പനി ഫുജൈറയില്‍ സ്ഥാപിക്കുന്ന ഇത്തിഹാദ് റിഫൈനറിയില്‍ ഉല്‍പ്പാദിപ്പിക്കുന്ന പെട്രോള്‍ ഉള്‍പ്പെടെയുള്ള ശുദ്ധീകരിച്ച പെട്രോളിയം ഉല്‍പ്പന്നങ്ങള്‍ വാങ്ങുന്നതിനുള്ള ദീര്‍ഘകാല കരാറാണിത്. പദ്ധതിയുടെ നിര്‍ണായക വാണിജ്യ നാഴികക്കല്ലായ ഈ കരാര്‍ ഫുജൈറയുടെ പ്രാദേശിക ഊര്‍ജകേന്ദ്രമെന്ന സ്ഥാനം കൂടുതല്‍ ശക്തിപ്പെടുത്തുമെന്ന് കമ്പനി അറിയിച്ചു.

ഇന്നലെ മുതല്‍ പ്രാബല്യത്തില്‍ വന്ന കരാര്‍ 10 വര്‍ഷത്തേക്കാണ് നിലവിലുണ്ടാകുക. റിഫൈനറി പ്രവര്‍ത്തനം ആരംഭിക്കുന്നതോടെ ഉല്‍പ്പാദിപ്പിക്കുന്ന യൂറോ 5 നിലവാരത്തിലുള്ള പെട്രോളും അനുബന്ധ ഉല്‍പ്പന്നങ്ങളും ഈ കരാറിന്റെ ഭാഗമായി വിതരണം ചെയ്യും. നാഫ്തയെ യൂറോ 5 നിലവാരത്തിലുള്ള പെട്രോളാക്കി മാറ്റുന്ന റിഫൈനറി മേഖലയിലെ ശുദ്ധമായ ഗതാഗത ഇന്ധനങ്ങളുടെ വര്‍ധിച്ചുവരുന്ന ആവശ്യകത നിറവേറ്റാന്‍ സഹായിക്കുമെന്നും കമ്പനി പ്രസ്താവനയില്‍ പറഞ്ഞു. 

നിലവിലുള്ള ഘട്ടം 1, ഘട്ടം 2 സ്റ്റോറേജ് ടാങ്കുകളും പദ്ധതിയുടെ ഭാഗമായി ഉപയോഗപ്പെടുത്തും. റിഫൈനറിയുടെ എന്‍ജിനീയറിങ്, ഡിസൈന്‍ പഠനങ്ങള്‍ ഇതിനകം ആരംഭിച്ചിട്ടുണ്ട്. ഇതിനായി ഹണിവെല്‍ യു.ഒ.പി (Honeywell UOP), പി.ഇ.ജി എന്നീ കമ്പനികളെയാണ് ചുമതലപ്പെടുത്തിയിരിക്കുന്നത്. പദ്ധതിയുടെ ആകെ ചെലവ് 300 മുതല്‍ 350 മില്യണ്‍ ഡോളര്‍ വരെയായിരിക്കുമെന്നാണ് നിലവിലെ കണക്ക്. അന്തിമ നിക്ഷേപ തീരുമാനം എടുത്തതിന് ശേഷമായിരിക്കും റിഫൈനറിയുടെ വാണിജ്യ പ്രവര്‍ത്തനം ആരംഭിക്കുന്ന തീയതി പ്രഖ്യാപിക്കുക.

പദ്ധതി പൂര്‍ണതോതില്‍ പ്രവര്‍ത്തനം ആരംഭിച്ചാല്‍ കമ്പനിയ്ക്കും ഓഹരിയുടമകള്‍ക്കും കുറഞ്ഞത് 1 ബില്യണ്‍ ഡോളറിന്റെ ദീര്‍ഘകാല മൂല്യവര്‍ധന ലഭിക്കുമെന്നാണ് എത്തിഹാദ് എനര്‍ജിയുടെ പ്രതീക്ഷ. എന്നാല്‍ ഇത് അന്തിമ പഠനങ്ങളുടെയും നിക്ഷേപ തീരുമാനത്തിന്റെയും അടിസ്ഥാനത്തില്‍ മാറ്റങ്ങള്‍ക്ക് വിധേയമായിരിക്കുമെന്ന് കമ്പനി അറിയിച്ചു.

റിഫൈനറി, സംഭരണം, ലോജിസ്റ്റിക്‌സ്, സമുദ്ര അടിസ്ഥാനസൗകര്യ വികസനം എന്നിവ ഉള്‍ക്കൊള്ളുന്ന സമഗ്ര ഊര്‍ജ ശൃംഖല വികസിപ്പിക്കുകയെന്ന കമ്പനിയുടെ ദീര്‍ഘകാല തന്ത്രത്തിന്റെ ഭാഗമാണ് ഈ പദ്ധതി. ലോകത്തിലെ ഏറ്റവും വലിയ എണ്ണ സംഭരണബങ്കറിംഗ് കേന്ദ്രങ്ങളിലൊന്നായ ഫുജൈറ, അന്താരാഷ്ട്ര ഊര്‍ജ വ്യാപാരത്തിലെ തങ്ങളുടെ പ്രാധാന്യം വര്‍ധിപ്പിക്കുന്ന നിരവധി നിക്ഷേപങ്ങള്‍ക്ക് ഇതിനകം വേദിയായിട്ടുണ്ട്.

English Summary:
Etihad Energy Holding has signed a 10-year fuel offtake agreement with the Fujairah Government for gasoline from its planned refinery. The $300–350 million project will produce Euro 5 gasoline, tsrengthen Fujairah's role as a regional energy hub, and is expected to generate at least $1 billion in long-term value.