കുവൈത്ത് സിറ്റി: ഭരണപരമായ കാരണങ്ങളാല്‍ കുവൈത്തിലെ ഇന്ത്യന്‍ എംബസി ജൂലൈ 9 വരെ കോണ്‍സുലര്‍, പാസ്‌പോര്‍ട്ട്, വിസ സേവനങ്ങള്‍ അടിയന്തര ആവശ്യങ്ങള്‍ക്ക് മാത്രമായി പരിമിതപ്പെടുത്തിയതായി അറിയിച്ചു. 
അടിയന്തര സാഹചര്യമാണെന്ന് തെളിയിക്കുന്ന രേഖകള്‍ സമര്‍പ്പിക്കുന്ന അപേക്ഷകളാണ് ഈ കാലയളവില്‍ പരിഗണിക്കുക. തത്കാല്‍ പാസ്‌പോര്‍ട്ട്, പ്രവാസി ഇന്ത്യന്‍ പൗരന്മാര്‍ക്ക് ആവശ്യമായ വിവിധ സര്‍ട്ടിഫിക്കറ്റുകള്‍, കാലാവധി കഴിഞ്ഞ സിവില്‍ ഐഡിയുമായി ബന്ധപ്പെട്ട ഹ്രസ്വകാല പാസ്‌പോര്‍ട്ടുകള്‍, എമര്‍ജന്‍സി സര്‍ട്ടിഫിക്കറ്റുകള്‍, ഇവിസ സേവനങ്ങള്‍ എന്നിവയാണ് ലഭ്യമാകുക.

അതേസമയം, സാധാരണ പാസ്‌പോര്‍ട്ട് അപേക്ഷകള്‍, അറ്റസ്റ്റേഷന്‍ സേവനങ്ങള്‍, സാധാരണ വിസ അപേക്ഷകള്‍ എന്നിവ ജൂലൈ 9 വരെ സ്വീകരിക്കുകയോ നടപടികള്‍ പൂര്‍ത്തിയാക്കുകയോ ചെയ്യില്ലെന്ന് എംബസി വ്യക്തമാക്കി.
കുവൈത്തിലെ എല്ലാ ഇന്ത്യന്‍ കോണ്‍സുലര്‍ ആപ്ലിക്കേഷന്‍ സെന്ററുകളും ഇനിയൊരു അറിയിപ്പ് ഉണ്ടാകുന്നതുവരെ അപേക്ഷകള്‍ സ്വീകരിക്കുന്നത് നിര്‍ത്തിവെച്ചിട്ടുണ്ട്.
അടിയന്തര ആവശ്യക്കാര്‍ രാവിലെ 9 മുതല്‍ 12 വരെ എംബസിയുടെ കോണ്‍സുലര്‍ വിഭാഗത്തില്‍ നേരിട്ട് എത്തണമെന്ന് എംബസി നിര്‍ദേശിച്ചു. ആവശ്യമായ തെളിവ് രേഖകള്‍ സമര്‍പ്പിക്കുന്നവരുടെ അപേക്ഷകള്‍ മാത്രമേ പരിഗണിക്കുകയുള്ളൂ എന്നും എംബസി അറിയിച്ചു.

English Summary: The Indian Embassy in Kuwait announced on Monday that consular, passport and visa services will be limited to emergency cases only until July 9 due to administrative reasons. It said services would be restricted to urgent applications supported by documents proving the need for immediate processing. The services include expedited passport issuance (tatkal), certificates for non-resident Indians, short-validity passports linked to expired civil IDs, emergency certificates and electronic visas.