കൊല്ലം: പുത്തൂരിൽ കെഎസ്ഇബി ജീവനക്കാരൻ ഷോക്കേറ്റ് മരിച്ചു. ചവറ സ്വദേശി അൽത്താഫ് (48) ആണ് മരിച്ചത്. ഇന്ന് വൈകിട്ട് നാല് മണിയോടെ പുത്തൂർ ആറ്റുവാശ്ശേരിയിലായിരുന്നു അപകടം.

ആറ്റുവാശ്ശേരിയിലെ ഒരു വീട്ടിൽ വൈദ്യുതി മുടങ്ങിയെന്ന പരാതിയെ തുടർന്ന് ലൈൻ പരിശോധിക്കാൻ എത്തിയതായിരുന്നു അൽത്താഫ്. ഇവിടുത്തെ വൈദ്യുതി പോസ്റ്റിൽ നിന്നും വീട്ടിലേക്കുള്ള സർവീസ് വയർ പൊട്ടിക്കിടക്കുന്ന നിലയിലായിരുന്നു. ഇത് പുനഃസ്ഥാപിക്കാനായി പോസ്റ്റിൽ കയറി ജോലി ചെയ്യുന്നതിനിടെയാണ് ഇദ്ദേഹത്തിന് ഷോക്കേറ്റത്.

അപകടത്തെ തുടർന്ന് ഉടൻ തന്നെ ഫയർഫോഴ്‌സ് സംഘം സ്ഥലത്തെത്തി അൽത്താഫിനെ പോസ്റ്റിൽ നിന്നും താഴെയിറക്കി പ്രഥമശുശ്രൂഷയും സി.പി.ആറും (CPR) നൽകി. തുടർന്ന് സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം നിലവിൽ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.

A KSEB (Kerala State Electricity Board) employee was electrocuted to death in Kollam while carrying out repair works on a power line.