കണ്ണൂർ: തിരിമുറിയാതെ മഴപെയ്യേണ്ട കർക്കടകം പിറന്നു. എന്നാൽ, പെരുമഴ തിമിർത്ത് പെയ്യേണ്ട കാലത്ത് സംസ്ഥാനത്ത് പകൽ കത്തുന്ന ചൂടാണ്. വിവിധ ജില്ലകളിലെ ചില പ്രദേശങ്ങളിലെ താപനില സാധാരണ ലഭിക്കുന്ന ചൂടിനെക്കാൾ അഞ്ച് ഡിഗ്രി സെൽഷ്യസ് കൂടുതലാണെന്ന് കേന്ദ്ര കാലാവസ്ഥ വകുപ്പ് സ്ഥിരീകരിച്ചു. ആന്ധ്രാപ്രദേശിൽ ഉഷ്ണതരംഗ മുന്നറിയിപ്പും നൽകിയിട്ടുണ്ട്. 
കാലവർഷം ദുർബലമായതോടെയാണ് കേരളത്തിൽ മഴയ്ക്ക് പകരം താപനിലയിൽ വർധന ഉണ്ടായത്. ഔദ്യോഗിക റെക്കോഡിൽ 35 ഡിഗ്രി സെൽഷ്യസിന് മുകളിൽ എത്തിയില്ലെങ്കിലും പ്രാദേശികമായി ചിലയിടങ്ങളിൽ താപനില 35 ഡിഗ്രിക്ക് മുകളിൽ രേഖപ്പെടുത്തി. പാലക്കാട് ഉയർന്ന താപനില സാധാരണയെക്കാൾ അഞ്ച് ഡിഗ്രി കൂടുതലാണ്. 28 ഡിഗ്രി സെൽഷ്യസ് സാധാരണ ചൂടുണ്ടാകേണ്ട പാലക്കാട് 33 ഡിഗ്രിയാണ് പകൽ താപനില.