മാഡ്രിഡ്: ലോകകപ്പ് ഫുട്‌ബോളിന്റെ ഫൈനലിന് ശേഷമുണ്ടായ സംഘര്‍ഷത്തില്‍ അര്‍ജന്റീന താരം ലിയാന്‍ഡ്രോ പരെഡസിനെതിരേ നടപടി വേണ്ടെന്ന് സ്‌പെയിന്‍ മധ്യനിര താരം ഗാവി. പരേഡസിനെ സസ്‌പെന്‍ഡ് ചെയ്യുമെന്ന് കരുതുന്നില്ല. സംഭവത്തിന്റെ ചിത്രം കാണുമ്പോള്‍ കുട്ടികള്‍ക്ക് നല്ലതായി തോന്നില്ല. എന്നാല്‍ ഫുട്‌ബോളിന് അത്തരമൊരു വശം കൂടിയുണ്ട്. ഫിസിക്കല്‍ ഗെയിമാണ് ഫുട്‌ബോള്‍. അതില്‍ അഗ്രസീവായിട്ടുള്ള പെരുമാറ്റമുണ്ടാവും. മത്സരത്തിനിടെ പരെഡസിനെ ചുവപ്പുകാര്‍ഡ് നല്‍കി പുറത്താക്കുന്നതായിരുന്നു ഉചിതമായ നടപടി. അവിടെ എല്ലാം അവസാനിക്കണം. ഫുട്‌ബോള്‍ അങ്ങനെയായിരിക്കണമെന്നാണ് ഞാന്‍ വിശ്വസിക്കുന്നതെന്നും ഗാവി പറഞ്ഞു. 

അതേസമയം അക്രമസംഭവങ്ങളുടെ പശ്ചാത്തലത്തില്‍ ഫിഫ അര്‍ജന്റീനയ്‌ക്കെതിരേ അന്വേഷണം പ്രഖ്യാപിച്ചിരുന്നു. ദൃശ്യങ്ങള്‍ പരിശോധിക്കാനും നിര്‍ദേശിച്ചിട്ടുണ്ട്. നേരത്തെ അര്‍ജന്റീന താരം റോബര്‍ട്ടോ അയാള സംഭവത്തില്‍ ഖേദം പ്രകടിപ്പിച്ചിരുന്നു. സ്‌പെയിനിന്റെ ഡാനി ഓല്‍മോയോട് ക്ഷമ ചോദിക്കുമെന്നും അദ്ദേഹം വ്യക്തമാക്കി. ഡാനി ഓല്‍മോയെ ഞാന്‍ മുഖത്തടിച്ചതല്ല. ചെറുതായൊന്ന് തള്ളിയതാണ്, അത് മുഖത്തടിച്ചത് പോലെ തോന്നിയതാണെന്നും അയാള പറഞ്ഞു. മത്സരശേഷം മൈതാനത്തിന്റെ മധ്യത്തില്‍ വാക് തര്‍ക്കം നടക്കുന്നത് കണ്ടു. അത് തടയാനായി എത്തിയതാണ്. ടീം സ്പിരിറ്റ് അങ്ങനല്ലാത്തത് കൊണ്ടാണ് ഇടപെട്ടത്. സംഭവിച്ചതിന്റെ ഉത്തരവാദിത്തം ഏറ്റെടുക്കുന്നു. അവരെ പിടിച്ചുമാറ്റാന്‍ മാത്രമായിരുന്നു ഉദ്ദേശമെന്നും അയാള പറഞ്ഞു.