ദമ്മാം: രാജ്യത്തെ ദേശീയ എണ്ണ കമ്പനിയായ സഊദി അരാംകോയുടെ എണ്ണ ശുദ്ധീകരണ ശാലയിലുണ്ടായ തീപിടുത്തത്തില്‍ എട്ടു തൊഴിലാളികള്‍ക്ക് പരുക്കേറ്റു. പരുക്കേറ്റവര്‍ ഏത് രാജ്യക്കാരാണെന്നു വ്യകതമല്ല. സ്വകാര്യ കോണ്‍ട്രാക്ടിംഗ് കമ്പനിയിലെ ആറു തൊഴിലാളികള്‍ക്കും രണ്ടു അരാംകോ ഉദ്യോഗസ്ഥര്‍ക്കുമാണ് പരുക്കേറ്റത്.

കിഴക്കന്‍ പ്രവിശ്യയിലെ അരാംകോയുടെ ആസ്ഥാന ശുദ്ധീകരണ ശാലയായ ദമാമിനടുത്ത റാസ്തനൂറ എണ്ണ ശുദ്ധീകരണ ശാലയില്‍ ചൊവ്വാഴ്ച രാവിലെ 9 മണിയോടെയാണ് തീപിടുത്തം ഉണ്ടായത്. തീപിടുത്തം ശ്രദ്ധയില്‍ പെട്ട ഉടനെ തന്നെ അരാംകോയുടെ അത്യാധുനിക സംവിധാനങ്ങളിലുള്ള ഉപകരണങ്ങളും സംവിധാനങ്ങളും ഉപയോഗിച്ച് തീയണക്കാന്‍ കഴിഞ്ഞതിനാല്‍ കൂടുതല്‍ നാശ നഷ്ടങ്ങള്‍ ഉണ്ടായിട്ടില്ലെന്നു അരാംകോ അധികൃതര്‍ വ്യക്തമാക്കി.

പരുക്കേറ്റവരെ അടുത്തുള്ള ആശുപത്രികളില്‍ പ്രവേശിപ്പിച്ചിരിക്കുകയാണ്. പ്രതി ദിനം 550,000 ബാരല്‍ എണ്ണ ശുദ്ധീകരണ ശേഷിയുള്ളതാണ് റാസ്തനൂറ ശുദ്ധീകരണ ശാല. തീപിടുത്തത്തെ തുടര്‍ന്ന് തങ്ങളുടെ എണ്ണ, പ്രകൃതി വാതക ശുദ്ധീകരണത്തിനും കയറ്റുമതിക്കും യാതൊരു തടസ്സവും നേരിട്ടിട്ടില്ലെന്നും അരാംകോ അധികൃതര്‍ വ്യക്തമാക്കി.