പയ്യന്നൂര്‍: കോണ്‍ഗ്രസ് നിയന്ത്രണത്തിലുള്ള സഹകരണ ബാങ്കിന് മുന്നില്‍ ധര്‍ണാ സമരം നടത്തിയ യൂത്ത് കോണ്‍ഗ്രസ് പയ്യന്നൂര്‍ നിയോജക മണ്ഡലം ഭാരവാഹികളെയും പ്രവര്‍ത്തകരെയും കോണ്‍ഗ്രസ് പ്രവര്‍ത്തകരും ബാങ്ക് ജീവനക്കാരും ചേര്‍ന്ന് മര്‍ദിച്ചു. ഇന്ന് രാവിലെ പത്ത് മണിയോടെയാണ് സംഭവം. പയ്യന്നൂര്‍ ടൗണ്‍ ബാങ്കില്‍ ഒഴിവുള്ള തസ്തികകളിലേക്ക് നിയമനം നടത്തുന്നതിനായി ഇന്റര്‍വ്യൂ നടത്തി റാങ്ക് ലിസ്റ്റ് തയാറാക്കിയിരുന്നു. എന്നാല്‍ സാധാരണ പാര്‍ട്ടി പ്രവര്‍ത്തകരെ തഴഞ്ഞുകൊണ്ട് കോഴ വാങ്ങി സ്വന്തക്കാര്‍ക്കും ബന്ധുക്കളെയും റാങ്ക് ലിസ്റ്റില്‍ ഉള്‍പ്പെടുത്തി അനധികൃത നിയമനം നല്‍കുവാന്‍ നീക്കം നടത്തുന്നുവെന്നാരോപിച്ച് യൂത്ത് കോണ്‍ഗ്രസ് പയ്യന്നൂര്‍ മണ്ഡലം പ്രസിഡന്റ് രജീഷ് കണ്ണോത്ത്, സെക്രട്ടറി മഞ്ജുള കൊയ്‌ലേരി, കെ.ടി ഹരീഷ് എന്നിവരുടെ നേതൃത്വത്തിലാണ് സമരം ആരംഭിച്ചത്. 

സമരം തുടങ്ങി അല്‍പസമയത്തിനകം തന്നെ ബാങ്ക് ജീവനക്കാരും കോണ്‍ഗ്രസ് പ്രവര്‍ത്തകരും സംഘടിച്ചെത്തി പ്രവര്‍ത്തകരെ അക്രമിക്കുകയായിരുന്നു. യൂത്ത് കോണ്‍ഗ്രസ് പയ്യന്നൂര്‍ മണ്ഡലം സെക്രട്ടറിയും ദലിത് യുവതിയുമായ മഞ്ജുള കൊയിലേരിയെ റോഡിലൂടെ വലിച്ചിഴക്കുകയും മര്‍ദിക്കുകയും ചെയ്തതായും ആരോപണമുണ്ട്. ഇവരെ പയ്യന്നൂര്‍ താലൂക്കാശുപത്രിയില്‍ പ്രവേശിപ്പിച്ചു. മണ്ഡലം പ്രസിഡന്റ് രജീഷ് കണ്ണോത്തിനെ കസേര കൊണ്ട് അടിച്ചതായും ആരോപണമുണ്ട്. കോണ്‍ഗ്രസ് ബ്ലോക്ക് പ്രസിഡന്റ് ഉള്‍പ്പടെ നോക്കി നില്‍ക്കവെയാണ് അക്രമം. സ്ഥലത്ത് പൊലിസ് സുരക്ഷ ശക്തമാക്കിയിട്ടുണ്ട്. യൂത്ത്‌കോണ്‍ഗ്രസിന്റെ ധര്‍ണാ സമരം തുടരുകയാണ്. സമരത്തിന്റെ ഒരുക്കങ്ങള്‍ നടത്തുന്നതിനിടെ ഇന്നലെ രാത്രിയിലും കോണ്‍ഗ്രസ് പ്രവര്‍ത്തകര്‍ തമ്മില്‍ സംഘര്‍ഷമുണ്ടായിരുന്നു.