കൂറ്റനാട്: മഴ കുറഞ്ഞതോടെ കര്‍ഷകര്‍ ആശങ്കയില്‍. പ്രധാനമായും നെല്‍കര്‍ഷകര്‍ക്കാണ് തിരിച്ചടി. മികച്ച വേനല്‍മഴ ലഭിച്ചപ്പോള്‍ വളരെ പ്രതീക്ഷയിലാണ് പലരും ഒന്നാംവിളയിറക്കിയത്. തൃത്താല മേഖലയില്‍  ചില പ്രദേശങ്ങളില്‍ മഴ ലഭിക്കാത്തതു കൊണ്ട് കതിരുകള്‍ ഉണങ്ങിപ്പോകുമെന്ന ആശങ്കയും കര്‍ഷകര്‍ക്കുണ്ട്. വട്ടേനാട്, പ്രദേശങ്ങളില്‍ മഴ തീരേ ലഭിക്കാത്തതു കൊണ്ട് ഞാറുനടീല്‍ നടത്തിയത് വിണ്ടുകീറി ഉണക്ക ഭീഷണിയിലാണ്.
സ്ഥലം പാട്ടത്തിനെടുത്ത് പണിയെടുക്കുന്ന കര്‍ഷകരാണ് ആകെ പ്രതിസന്ധിയിലായിരിക്കുന്നത്. ഓണത്തോടനുബന്ധിച്ച് പാടങ്ങള്‍ ഉഴുതുമറിച്ചു നടീല്‍ നടത്താനായി തയ്യാറാക്കിയ പാടങ്ങളും വറ്റിവരണ്ട നിലയിലാണ് പല സ്ഥലത്തും. പലരും കിണറുകളില്‍ നിന്നും കുളങ്ങളില്‍ നിന്നും വെള്ളം പമ്പ് ചെയ്താണ് വെള്ളം കണ്ടത്തുന്നത്. ചിങ്ങം കഴിഞ്ഞു കന്നിമാസം പിറന്നിട്ടും മഴയുടെ ലക്ഷണമില്ലാത്തത് കൊണ്ട് കര്‍ഷകര്‍ ആകെ പ്രതിസന്ധിയിലാണ്.