വടകര:വില്യാപ്പള്ളി കേന്ദ്രമായി സര്‍വീസ് നടത്തുന്ന ഓട്ടോഡ്രൈവറെ വടകര എസ്.ഐ മര്‍ദിച്ചതായി പരാതി. പരുക്കേറ്റ ഡ്രൈവര്‍ മംഗലാട് എള്ളോടിമലയില്‍ ബിജിത്തിനെ (38) ജില്ലാ ആശുപത്രിയില്‍ പ്രവേശിപ്പിച്ചു. മര്‍ദനത്തില്‍ പ്രതിഷേധിച്ച് വില്യാപ്പള്ളിയില്‍ ഓട്ടോ ഡ്രൈവര്‍മാര്‍ പണിമുടക്കി. ചൊവ്വാഴ്ച ഉച്ചയോടെയാണ് ഓട്ടോ ഡ്രൈവര്‍ ബിജിത്തിനെ എസ്.ഐ വിളിപ്പിച്ചത്. ഓട്ടോയില്‍ യാത്രചെയ്ത ആളുമായി ചില്ലറയുടെ പേരില്‍ ഡ്രൈവര്‍ തര്‍ക്കമുണ്ടാക്കിയതായി പറയുന്നു. ഇതിന്റെ പേരില്‍ യാത്രക്കാരനും ഡ്രൈവറും തമ്മില്‍ ഉന്തുംതള്ളും നടന്നിരുന്നു.
 ഇക്കാര്യത്തില്‍ യാത്രക്കാരന്‍ വടകര പൊലിസില്‍ പരാതി നല്‍കിയതിന്റെ അടിസ്ഥാനത്തിലാണ് എസ്.ഐ വിളിപ്പിച്ചത്. സംഭവ സമയം ഒപ്പം യാത്രചെയ്തയാളുമായാണ് ബിജിത്ത് പൊലിസ് സ്റ്റേഷനില്‍ എത്തിയത്. തുടര്‍ന്ന് ബിജിത്തിനെ മര്‍ദിക്കുകയും വൈകല്യമുള്ള കാലില്‍ ചവിട്ടുകയുമായിരുന്നുവെന്ന് പറയുന്നു.
പിന്നീട് യാത്രക്കാരന്‍ പരാതി പിന്‍വലിച്ചതായും പൊലീസിനെതിരെ പരാതിപ്പെട്ടാല്‍ ഇനിയും മര്‍ദിക്കുമെന്ന് എസ്.ഐ ഭീഷണിപ്പെടുത്തിയതായും ബിജിത്ത് പറഞ്ഞു. ചൊവ്വാഴ്ച രാത്രി ആശുപത്രിയില്‍ പ്രവേശിക്കപ്പെട്ട ബിജിത്തിന്റെ മൊഴി ഇന്നലെ വൈകുന്നേരമായിട്ടും പൊലിസ് രേഖപ്പെടുത്തിയിട്ടില്ല. എസ്.ഐക്കെതിരേ നടപടി വേണമെന്ന് ആവശ്യപ്പെട്ട് ഓട്ടോഡ്രൈവര്‍മാര്‍ വില്യാപ്പള്ളിയില്‍ പ്രകടനം നടത്തി.