തിരുവനന്തപുരം: സംസ്ഥാനത്തെ സ്വാശ്രയ മെഡിക്കല്‍ കോളജ് പ്രവേശനവുമായി ബന്ധപ്പെട്ട് തലവരിപ്പണം ഈടാക്കുന്നുവെന്ന ആരോപണത്തിന്മേല്‍ വിജിലന്‍സ് അന്വേഷണം നടത്തുമെന്ന് മുഖ്യമന്ത്രി പിണറായി വിജയന്‍ നിയമസഭയെ അറിയിച്ചു. തലവരിപ്പണം ഈടാക്കുന്നതായി ചില പത്രങ്ങളിലും ചാനലുകളിലും വാര്‍ത്ത വന്നതിനെ സംബന്ധിച്ച് അന്വേഷണം നടത്താന്‍ വിജിലന്‍സിനോട് നിര്‍ദേശിക്കും. വാര്‍ത്ത പുറത്തുകൊണ്ടുവന്ന മാധ്യമങ്ങളും ആരോപണം ഉന്നയിച്ച പ്രതിപക്ഷവും തങ്ങളുടെ പക്കലുള്ള തെളിവുകള്‍ വിജിലന്‍സിന് കൈമാറണമെന്നും മുഖ്യമന്ത്രി ആവശ്യപ്പെട്ടു. വിഷയത്തില്‍ കര്‍ക്കശമായ നിലപാട് സ്വീകരിക്കാന്‍ വിജിലന്‍സിന് നിര്‍ദേശം നല്‍കും.
താന്‍ സര്‍വകക്ഷിയോഗത്തില്‍ പങ്കെടുത്തില്ല എന്ന മട്ടില്‍ ചില മാധ്യമങ്ങളില്‍ വാര്‍ത്ത വന്നിരുന്നു. പ്രതിപക്ഷവും അതേറ്റു പിടിച്ചു. എന്നാല്‍ സഭ നിര്‍ത്തി വച്ചശേഷം ഓഫിസിലുണ്ടായിരുന്ന തന്നെ സ്പീക്കറോ മറ്റാരെങ്കിലുമോ ഒരു യോഗത്തിനും ക്ഷണിച്ചിരുന്നില്ലെന്നും മുഖ്യമന്ത്രി പറഞ്ഞു.