വാളയാര്‍: കാട്ടാനയുടെ ശല്യം വാളയാറിനെ വിട്ടൊഴിയുന്നില്ല. വാളയാറിന് സമീപം വാധ്യാര്‍ചള്ളയില്‍ തിങ്കളാഴ്ച ഇറങ്ങിയ കാട്ടാന പഞ്ചായത്ത് കുഴല്‍കിണറും പൈപ്പ്‌ലൈനും തകര്‍ത്തു.
കൂടാതെ പ്രദേശത്തെ സൈ്വര്യവിഹാരം നടത്തിയ കാട്ടാന നെല്‍കൃഷിയും നശിപ്പിച്ചു. വാധ്യാര്‍ചള്ളയിലെ കമലത്തിന്റെ നെല്‍ കൃഷിയാണു കാട്ടാനക്കൂട്ടം നശിപ്പിച്ചത്. തിങ്കളാഴ്ച രാത്രിയോടെയായിരുന്നു പ്രദേശത്ത് കാട്ടാനയുടെ പരാക്രമം ഉണ്ടായിരുന്നത്. മാസങ്ങളായി തുടരുന്ന കാട്ടാനയുടെ ശല്യം കാരണം മേഖലയിലുള്ളവര്‍  ഏറെ ഭയപാടിലാണ്.
പല കര്‍ഷകരും ബാങ്കില്‍ നിന്നും വായ്പ എടുത്തിട്ടാണ് കൃഷി ചെയ്യുന്നത്. കര്‍ഷകരുടെ ജീവനും സ്വത്തിനും സംരക്ഷണം നല്‍കണമെന്ന് പ്രദേശവാസികള്‍ സര്‍ക്കാരിനോടാവശ്യപ്പെട്ടു.