തിരുവനന്തപുരം: രാജ്യത്ത് ഏകസിവില്‍ കോഡ് നടപ്പാക്കുന്നതുമായി ബന്ധപ്പെട്ട് പൊതുജനങ്ങളില്‍ നിന്ന് അഭിപ്രായമറിയാനുള്ള നിയമകമ്മിഷന്റെ തീരുമാനത്തെ തള്ളിക്കളഞ്ഞ മുസ്‌ലിം വ്യക്തിനിയമ ബോര്‍ഡ് തീരുമാനത്തെ എസ്.വൈ.എസ് തിരുവനന്തപുരം ജില്ലാ സെക്രട്ടറി അബ്ദുല്‍ അസീസ് മുസ്‌ലിയാര്‍ സ്വാഗതം ചെയ്തു.
ശരീഅത്ത്  ദൈവീക കല്‍പനകളാണ് അത് മാറ്റാന്‍ പറ്റില്ല. രാജ്യത്തെ ജനങ്ങല്‍ക്കിടയില്‍ ഐക്യമുണ്ടാക്കുന്ന നീക്കമാണ് സര്‍ക്കാരിന്റെ ഭാഗത്തുനിന്നും ഉണ്ടാകേണ്ടതെന്നും മറിച്ചുള്ള പ്രവര്‍ത്തനങ്ങളെ അംഗീകരിക്കാനാകില്ലെന്നും അദ്ദേഹം പറഞ്ഞു.
കൊല്ലം: ഇന്ത്യയിലെ മതേതര ജനാധിപത്യ സംവിധാനത്തെ തകര്‍ക്കുന്ന ഏകസിവില്‍കോഡ് നടപ്പിലാക്കാന്‍ വേണ്ടി പരസ്യപ്പെടുത്തിയിരിക്കുന്ന ചോദ്യാവലി ദുരുദ്ദേശപരമായതിനാല്‍ അവഗണിക്കാനുള്ള അഖിലേന്ത്യാ മുസ്‌ലിം പേഴ്‌സണല്‍ ലോ ബോര്‍ഡ് തീരുമാനം തികച്ചും സ്വാഗതാര്‍ഹമാണെന്ന് മുസ്‌ലിം സംഘടനാ നേതൃയോഗം അഭിപ്രായപ്പെട്ടു.
കേന്ദ്രന്യൂനപക്ഷ വകുപ്പ് മന്ത്രി അബ്ബാസ് നഖ്‌വി പറഞ്ഞതുപോലെ കമ്മിഷന്‍ നടത്തുന്നത് അക്കാഡമിക് പഠനമാണെങ്കില്‍ ഖജനാവിന്റെ പണം ദുര്‍വ്യയം ചെയ്ത് ലോ കമ്മിഷനെ നിയമിക്കാതെ ബോധവല്‍ക്കരണം നടത്തിയാല്‍ മതിയാകുമെന്നും യോഗം അഭിപ്രായപ്പെട്ടു. ന്യൂനപക്ഷാവകാശങ്ങളെ അട്ടമറിക്കാന്‍ ഭൂരിപക്ഷ സമുദായങ്ങള്‍ക്ക് അവസരമൊരുക്കാനുള്ള ഗൂഡതന്ത്രമാണ് കമ്മിഷന്റെ ചോദ്യാവലി. ഈ ചതിക്കുഴി തിരിച്ചറിഞ്ഞ് സമുദായ സംഘടനകളും വ്യക്തികളും ചോദ്യാവലി പൂര്‍ണ്ണമായി അവഗണിക്കണമെന്ന് യോഗം ആഹ്വാനം ചെയ്തു.
കൊല്ലത്ത് കൂടിയ അടിയന്തിര യോഗത്തില്‍ ജമാഅത്ത് ഫെഡറേഷന്‍ സംസ്ഥാന പ്രസിഡന്റ് കടയ്ക്കല്‍ അബ്ദുല്‍ അസീസ് മൗലവി അധ്യക്ഷനായി. ജനറല്‍ സെക്രട്ടറി അഡ്വ:കെ.പി.മുഹമ്മദ് പ്രമേയം അവതരിപ്പിച്ചു. ദക്ഷിണകേരള ജംഇയ്യത്തുല്‍ ഉലമാ സംസ്ഥാന സെക്രട്ടറി തൊടിയൂര്‍ മുഹമ്മദ് കുഞ്ഞ് മൗലവി ചര്‍ച്ച ഉദ്ഘാടനം ചെയ്തു. തേവലക്കര അലിയാരുകുഞ്ഞ് മൗലവി, എം.എ.സമദ്, എ.കെ.ഉമര്‍ മൗലവി, പാങ്ങോട് എ.ഖമറുദ്ദീന്‍ മൗലവി, തുടങ്ങിയവര്‍ ചര്‍ച്ചയില്‍ പങ്കെടുത്തു.