മലപ്പുറം: മുസ്‌ലിംലീഗ് മെമ്പര്‍ഷിപ്പ് കാംപയിനിന്റെ ഭാഗമായി ശേഖരിച്ച ഡാറ്റകള്‍ സോഫ്റ്റ്‌വെയറില്‍ എന്‍ട്രി ചെയ്യുന്ന പ്രവര്‍ത്തനത്തിന് തുടക്കമായി.
പാര്‍ട്ടി അംഗങ്ങളുടെ മുഴുവന്‍ വിവരങ്ങളും വിരല്‍ത്തുമ്പില്‍ ലഭ്യമാകുന്ന സംവിധാനം കേരളത്തില്‍ ഇതാദ്യമായാണ് ഒരു രാഷ്ട്രീയ പാര്‍ട്ടി ആരംഭിക്കുന്നത്. വിപുലമായ സംവിധാനങ്ങളുള്ള സോഫ്റ്റ്‌വെയറാണ് ഇതിനായി തയാറാക്കിയത്. ഈ പ്രക്രിയക്കായി നിയോജക മണ്ഡലം, പഞ്ചായത്ത്, വാര്‍ഡ് കേന്ദ്രങ്ങളില്‍ അഡ്മിന്‍മാരെ തെരഞ്ഞെടുത്തിട്ടുണ്ട്. നവമ്പര്‍ 30 വരെയാണ് വിവരങ്ങള്‍ എന്‍ട്രി ചെയ്യുന്നതിനുള്ള അവസരം. കോഴിക്കോട് പൂവാട്ട്പറമ്പ് ആസ്ഥാനമായി പ്രവര്‍ത്തിക്കുന്ന ശിഹാബ് തങ്ങള്‍ സെന്റര്‍ ഫോര്‍ പൊളിറ്റിക്കല്‍ സ്റ്റഡീസ് ആണ് സോഫ്റ്റ്‌വെയര്‍ തയാറാക്കിയത്.
പാണക്കാട് നടന്ന ചടങ്ങില്‍ സയ്യിദ് ഹൈദരലി ശിഹാബ് തങ്ങള്‍ സ്വന്തം വിവരങ്ങള്‍ എന്‍ട്രി ചെയ്ത് ഉദ്ഘാടനം നിര്‍വഹിച്ചു. പി.കെ കുഞ്ഞാലിക്കുട്ടി, കെ.പി.എ മജീദ്, സയ്യിദ് അബ്ബാസലി ശിഹാബ് തങ്ങള്‍, മുജീബ് കാടേരി, ഷറഫുദ്ദീന്‍ പൂവാട്ടുപറമ്പ്, പി. ബീരാന്‍കുട്ടി ഹാജി, വി. മുസ്തഫ പ്രസംഗിച്ചു.